SQO-da eki kúnde 60 adam donor bolý úshin qan ortalyǵyna kelgen
Petropavldaǵy qan ortalyǵy 7-8 qańtar kúnderi mereke jáne demalys bolǵanyna qaramastan jumys istedi. Oǵan donorlardyń tolassyz kelýi sebep bolǵan.
«Eldegi jaǵdaıdy eskere otyra ótken demalys kúnderi jumysqa shyǵýǵa bel býdyq. Donorlar belsendilik tanytty, eshqandaı shaqyrtýsyz ózderi keldi. Bir qýantarlyǵy, únemi qan tapsyryp júrgen donorlardan basqa, birinshi ret kelgender de kóp boldy. Basym bóligi – jastar. 7 qańtar kúni 22 adam, al 8 qańtarda 38 adam keldi. Qan qoryn áli de tolyqtyramyz. Sondyqtan, 18-den 45 jasqa deıingi deni saý turǵyndardy donor bolýǵa shaqyramyz», - deıdi SQO qan ortalyǵy bólim meńgerýshisiniń mindetin atqarýshy Svetlana Zadvornaıa.
Mamannyń aıtýynsha, qan ortalyǵynda jetkilikti mólsherde qan bar, belgili bir qan tobyna tapshylyq joq. Soǵan qaramastan munda ár donordy qýana qarsy alady.
«Ádette donorlarymyz qan tapsyrǵany úshin aqy alǵylary kelmeıdi. Biraq biz 0,25 AEK mólsherinde tólem jasaýǵa mindettimiz, bul qarajat olardyń aǵzasyn qalypqa keltirýge beriledi. Byltyr qan tapsyrýǵa 10 myń ótinish tússe, sonyń 8 myńy tapsyrdy. Donorlarymyz negizinen jastar – stýdentter, medıtsınalyq mekemelerdiń qyzmetkerleri jáne kúsh qurylymdarynyń ókilderi», - deıdi Svetlana Zadvornaıa.