SQO-da eki balaǵa qyzylsha dıagnozy qoıyldy

PETROPAVL. QazAqparat – Soltústik Qazaqstan oblysynda jyl basynan beri bes bala qyzylsha aýrýyna kúdiktelse, sonyń ekeýinde dıagnoz zerthanalyq jolmen rastaldy, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, qyzylsha boıynsha epıdemıologııalyq jaǵdaı elimizde turaqsyz, bıyl 5 aıda 715 adamda tirkelgen.

SQO-da da qaýipti dert boıynsha 5 bala qaralsa, sonyń ekeýinde qyzylsha rastaldy.

«Qyzylshamen aýyrǵan balalardyń bireýi ony Almatydan juqtyryp kelgen. Ekinshisi eshqaıda shyqpaǵan. Qazir bir bala ınfektsııalyq bólimde stantsıonarlyq em alyp jatyr. Ata-anasy profılaktıkalyq ekpelerden bas tartqan.

Ekinshi balaǵa qyzylshaǵa, qyzamyqqa jáne indettik parotıtke qarsy vaktsınanyń eki komponenti qoıylǵan. Ol táýir bolyp, úıine jiberildi», - deıdi Arman Kúshbasov.

Mamannyń aıtýynsha, qyzylsha asa juqpaly vırýsty ınfektsııa. Ol aýa-tamshy jolymen taralyp, shyryshty qabat arqyly ishke enedi. Juqpamen tek adamdar ǵana aýyrady.

«Qyzylshanyń asqynýynan adam ólip ketýi múmkin. Kóbinese bes jasqa deıingi balalarda nemese 30 jastan asqan eresekterde asqynýlar bolady. Saldarynan soqyrlyq, entsefalıt, aýyr dıareıa jáne onymen baılanysty degıdratatsııa, qulaq ınfektsııalary jáne pnevmonııa sııaqty aýyr tynys joldarynyń ınfektsııalary paıda bolýy múmkin.

Júktilik kezinde qyzylshany juqtyrǵan áıelderde de aýyr asqyný bolyp, ózdiginen túsik túsip nemese merziminen buryn bosanyp qalýy múmkin», - deıdi sanıtar dáriger.

Qyzylsha ádette, bette makýlopapýlıarly bórtpemen, 39 gradýstan joǵary temperatýramen, konıýnktıvıt, jótel, murynnan sý aǵý jáne Belskıı-Fılatov-Koplık - aýyzdaǵy aq daqtarmen bastalady.

«Qyzylshamen kúrestiń tıimdi joly – vaktsınatsııa. Dertke qarsy vaktsına 50 jyldan astam ýaqyt boıy qoldanylyp keledi. Bul monovaktsına, qyzamyq pen parotıtke qarsy vaktsınalarmen biriktirilgende túrinde de qaýipsiz jáne birdeı tıimdi. Immýndyq qorǵanysty qamtamasyz etý úshin QR egýdiń ulttyq kúntizbesine sáıkes vaktsınanyń eki dozasy qajet – birinshi egý balanyń 12-15 aıynda, al ekinshisi 6 jasta qoıylady. Ótkizip alǵan dozalardy kez kelgen jasta, onyń ishinde eresek jasta da alýǵa bolady», - deıdi Arman Kúshbasov.

Eger aýrýdyń belgileri paıda bolsa, dereý medıtsınalyq uıymǵa habarlasý kerek.