SQO-da dúnıege kelgenderden qaıtys bolǵandardyń sany kóp

PETROPAVL. QazAqparat – Soltústik Qazaqstan oblysynda turyp jatqan halyqtyń teń jartysy – aýyl turǵyny. Qazirgi ýaqytta óńirde 533,4 myń adam turyp jatyr, dep habarlaıdy QazAqparat tilshisi.

Ulttyq statıstıka bıýrosynyń SQO boıynsha departamenti baspasóz qyzmetiniń málimetinshe, bıylǵy 1 sáýirge oblystaǵy halyq sany 533,4 myń adamdy qurady, onyń ishinde qalalyqtar – 259,1 myń adam nemese 48,6% jáne aýyldyqtar – 274,3 myń adam - 51,4%.

Alǵashqy úsh aıda 1332 náreste dúnıege keldi. Ómir esigin ashqan balalardyń 681 – ul jáne 651 – qyz. Jańa týǵan nárestelerdiń 539-y - 40,5% Petropavlda týǵan.

Oblys aýdandary arasynda eń joǵary týý koeffıtsıenti Ýálıhanov aýdanynda – 14,55 promılle, Shal aqyn aýdanynda – 11,84, Aqjar aýdanynda – 11,51 promılle.

Oblys boıynsha eń tómen týý kórsetkishi Esil aýdanynda – 8,45, Aqqaıyń – 9,00, Qyzyljar aýdanynda – 9,32 promılle.

Bıylǵy qańtar-naýryzda 1514 adam qaıtys boldy.

Turǵyndardyń ómirden ótýi sebepteri arasynda eń úlken úles - qan aınalymy júıesiniń aýrýlaryna jatady, 17,4% alady, ekinshi orynda 14,3% tynys alý organdarynyń aýrýlary, 8,9% - onkologııa, 8,7% - as qorytý organdarynyń aýrýlary, 6,3% - jazataıym oqıǵalar, ýlaný men jaraqattaný alǵan.

Ólim-jitim koeffıtsıenti oblys boıynsha 11,53 promılleni qurady.

2023 jyldyń I toqsanynda 625 neke tirkeldi, ol ótken jyldyń sáıkes kezeńimen salystyrǵanda 16,4% kem.

Azamattyq hal aktilerin tirkeý organdarynyń derekteri boıynsha, nekeni buzý týraly sot sheshimderin eskerýsiz, 144 ajyrasý tirkeldi.

Buǵan deıin SQO-da bıyl otaý quryp, nekesin tirkegen eń egde jastaǵy áıeldiń jasy – 82-de, al er adamnyń 81-de ekenin aıtqan edik.