SQO-da dinı sıpattaǵy materıaldardy taratqany úshin 9 adam sottaldy

PETROPAVL. QazAqparat – Soltústik Qazaqstan oblysynda dinı sıpattaǵy materıaldardy taratqany úshin 9 adam ákimshilik jaýapkershilikke tartylyp, aıyppul tóledi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, dinı sıpattaǵy materıaldardy taratqandarǵa Ákimshilik quqyq buzýshylyq týraly kodekstiń 490-babymen 200 AEK mólsherine deıin aıyppul qarastyrylǵan.

Ǵ. Músirepov atyndaǵy aýdannyń 39 jastaǵy turǵyny WhatsApp messendjerinde bir aı boıy dinı sıpattaǵy materıaldar men fotosýretterdi ornalastyryp kelgen. Zań buzǵany úshin aýyl turǵynyna qatysty ákimshilik materıal jınastarylyp, is aýdandyq sotqa joldandy.

Aýdandyq sot er adamdy kináli dep tanyp, oǵan 35 AEK mólsherinde aıyppul saldy.

«Dinı ádebıetti, dinı sıpattaǵy basqa da aqparattyq materıaldardy, dinı maqsatta qoldanylatyn zattardy tek dinı ǵımarattarda, dinı bilim beretin uıymdarda, sondaı-aq jergilikti atqarýshy organdarmen belgilengen statsıonarlyq úı-jaılarda taratýǵa ruqsat etilgen. Petropavlda bundaı 15 arnaıy oryn bar, taǵy biri Aıyrtaý aýdanynda ornalasqan», - deıdi SQO PD ekstremızmge qarsy is-qımyl basqarmasynyń basshysy Rýslan Jarasbaev.

Jyl basynan dinı sıpattaǵy materıaldardy taratqany úshin 9 soltústikqazaqstandyq ákimshilik jaýapkershilikke tartyldy.