SQO-da destrýktıvti dinı aǵymdy ustanǵan 6 adam jazalandy
«Óńirdiń polıtsııa qyzmetkerleri dinı zańnama salasyndaǵy zańbuzýshylyqqa jol bermeý boıynsha birqatar shara qabyldady. Sonymen birge, oblys turǵyndaryn destrýktıvti dinı aǵymdardan qorǵaý boıynsha aldyn alý jumystary júrgizilýde. Ártúrli dinı aǵymdar tyıymǵa baılanysty óz jumysyn asa saqtyqpen júrgizetini belgili. Qazirgi ýaqytta bul baǵytta teris pıǵyldylar áleýmettik jeliler men messendjerlerdi óz quralyna aınaldyryp alǵan», - delingen departament habarlamasynda.
SQO Polıtsııa departamenti áleýmettik jeliler men messendjerlerge monıtorıng júrgize otyryp, destrýktıvti dinı aǵymdy ustanǵan 6 adamnyń ákimshilik jaýapkershilikke tartylǵanyn habarlaıdy. Sot qaýlysymen olardyń árqaısysyna 50 AEK mólsherinde aıyppul salynǵan.
«Soltústik Qazaqstan oblysynyń Polıtsııa departamenti ınternet-resýrstardy qoldanýshylarǵa saq bolýdy shaqyrady. Polıtsııa qyzmetkerleri kúdikti adamdarmen tanysýda, ınternet arqyly dinı kitaptardy satýda, ártúrli sıpattaǵy toptarǵa kirýde abaı bolýdy eskertedi», - delingen departament habarlamasynda.