SQO-da demalys kúnderi kóptegen áleýmettik nysandardyń jumysyna tyıym salynbaq

PETROPAVL. QazAqparat – Soltústik Qazaqstan oblysynda koronavırýsty juqtyrǵandar sanynyń artýyna baılanysty 26 shildeden bastap shekteý sharalary qatańdatylady, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, 26 shildeden bastap oblys aýmaǵynda birqatar shekteý sharalary engiziledi. Bul joly senbi-jeksenbi kúnderi saýda, oıyn-saýyq ortalyqtarynyń, azyq-túlik satatyn jabyq bazarlardan basqasy, saýnalar, sporttyq keshender, basseınder jáne saýyqtyrý, fıtnes ortalyqtarynyń jumysyna shekteý qoıylady.

«Ashyq» baǵdarlamasyna qatyspaıtyn mádenıet nysandary, teatr men kınoteatrlardyń, fılarmonııalar men kontsert zaldarynyń jumysy toqtatylady. Al baǵdarlamany engizgen nysandarǵa 30 % syıymdylyqpen jumys isteýge ruqsat etiledi. Sondaı-aq aýmaǵy 2 myń sharshy metrden asatyn saýda oryndarynyń jumys kestesi tańeteńgi saǵat 9.00-den keshki saǵat 18.00-ge deıin qysqartylady. Olar da 50 % syıymdylyqpen kelýshilerdi qabyldaýǵa mindetti.

Halyqqa qyzmet kórsetetin nysandar 80 % syıymdylyqpen jumys isteı alady. Medıtsınalyq ortalyqtar men stomatologııa kabınetterine aldyn ala jazylý kerek. Sonda ǵana olardyń jumysyna ruqsat etiledi.

Sporttyq sharalardy kórermendermen ótkizýge tyıym salynady.