SQO-da byltyr melanomadan 3 adam qaıtys bolǵan

PETROPAVL. QazAqparat – Soltústik Qazaqstan oblysynda melanoma obyrynan byltyr 3 adam qaıtys bolsa, bıyl bir syrqat kóz jumdy. Onkologtardyń aıtýynsha, qaterli isiktiń bul túrimen kóbine 30-35 jastaǵylar, sonyń ishinde áıelder aýyrady, dep habarlaıdy QazAqparat tilshisi.

SQO onkologııalyq ortalyq emhanasynyń meńgerýshisi Marat Turǵynovtyń aıtýynsha, qazirgi ýaqytta óńirde melanoma qaterli isigimen 141 adam dıspanserlik esepte tur.

2021 jyly - 28, byltyr 13 adamǵa bul dıagnoz jańadan qoıylǵan. Al jyl bastalǵaly 6 adam dárigerlerdiń esebine alyndy.

«Melanoma – bul eń tez damıtyn, biraq sırek kezdesetin qaterli isiktiń biri. Negizinen ol teride paıda bolady, adamdar ony qal eken dep, kóbine mán bermeı ýaqytty ótkizip alyp jatady. 2021 jyly obyrdyń osy túrinen úsh adam, byltyr da úsh syrqat kóz jumdy. Bıyl bir adam osy melanomadan qaıtys boldy», - deıdi dáriger.

Mamannyń aıtýynsha, SQO-da dıspanserlik esepte turǵandardyń 96-sy – áıel, 45-i – er adam.

Teri melanoma dıagnozy kóbine 30-35 jastaǵylarǵa qoıylady. Áıelderdiń aıaǵyna shyqsa, erlerdiń arqasynda paıda bolady.

«Melanoma negizinen qal-nevýstyń ornynda damıdy, tek 28-30% ǵana taza teride paıda bolady. Qater tobyna kásibine baılanysty kún astynda júretin adamdar, demalysyn únemi tómen geografııalyq endikte – Túrkııa, BAÁ, Mysyr jáne Jerorta teńizi elderinde ótkizetinder, aǵza pıgmentatsııasy buzylǵandar, ımmýndyq tapshylyǵy barlar jáne teri melanomasymen aýyratyn týystary barlar jatady. Budan basqa uzaq ýaqyt gormonaldy preparatty qabyldaıtyndar, meń-qaly únemi mehanıkalyq zaqym alatyndar, 1,5 sm úlken nemese qara-qońyr tústi qaly-meńi barlar jáne denesinde 50-den astam túrli meńi barlar da saqtanǵany jón. Júktilik jáne bala emizý kezinde de qaýip arta túsedi», - deıdi Marat Turǵynov.

Altyn ýaqytty ótkizip almaý úshin dáriger qal-meńniń túsi men kólemin baqylaýda ustaýǵa keńes beredi.

«Melanoma kezinde nevýs tez úlkeıe bastaıdy. Túsi, kólemi ózgerip, aýyrsyný, qanaý, qyshý paıda bolady. Nevýstyń ústindegi túk túsip, aınalasy qyzarýy múmkin. Jaqynda paıda bolǵan, pishini ózgeshe, shetteri birtegis emes qalǵa da mán berý kerek. Ádette melanoma kezinde lımfa túıinderi de ulǵaıa túsedi. Osy belgilerdiń bireýi paıda bolǵan jaǵdaıda jedel túrde dermatologke nemese onkologke baryp kóriný qajet», - deıdi Marat Turǵynov.