SQO-da byltyr esirtki qylmysy úshin sottalǵan 139 adamnyń 8-i – sheteldik

PETROPAVL. QazAqparat – Soltústik Qazaqstan oblysynda byltyr 250-ge jýyq esirtki qylmysy tirkeldi. Jazalanǵan 139 adamnyń 8-i – sheteldiń azamaty, dep habarlaıdy QazAqparat tilshisi.

Óńirlik kommýnıkatsııalar qyzmetinde «SQO-da nashaqorlyqtyń aldyn alý jáne aǵymdaǵy jaǵdaı týraly» baspasóz konferentsııasy ótip, esirtki qylmysyna qarsy is-qımyl basqarmasynyń bastyǵy Ivan Terzıdı byltyr atqarylǵan jumysqa toqtaldy.

Ótken jyly óńirde 242 esirtki qylmysy tirkelgen. Onyń ishinde esirtki kontrabandasy, esirtki zattaryn úlken mólsherde saqtaý, satý jáne qoldan jasaý faktileri bar.

«Zańsyz aınalymnan 425 kg túrli esirtki alyndy, sonyń ishinde 3 kg 428 gr-y – sıntetıkalyq esirtki.

Almatydan Petropavlǵa jáne Astanadan Petropavlǵa sıntetıkalyq esirtki jetkizýdi jolǵa qoıǵan eki kanal áshkerelendi. Sondaı-aq oblysta ony qoldan jasap kelgen bir zerthana anyqtalyp, jabyldy.

Petropavlda esirtki satatyn ınternet dúken uıymdastyryp, sıntetıkalyq esirtkini taratyp kelgen 22 jastaǵy jigit ustaldy. Qazirgi ýaqytta onyń kinási dáleldenip, túzeý mekemesinde jazasyn ótep jatyr», - deıdi Ivan Terzıdı.

Budan basqa tártip saqshylary esirtkini taratyp, satýǵa qatysy bar 193 saıtty anyqtap, QR tsıfrlyq damý mınıstrligi arqyly olardy japty.

«Jalpy, byltyr esirtki saýdasyna qatysy bar 139 adam qylmystyq jaýapkershilikke tartyldy, jazalanǵandardyń segizi - shetel azamaty. Qylmystyń bul túri úshin búginde 10 jyldan 20 jylǵa deıin bas bostandyǵynan aıyrý jazasy qarastyrylǵan», - deıdi basqarma bastyǵy.

Statıstıkalyq málimetterge súıensek, búgingi tańda SQO-da nashaqor retinde 499 adam resmı tirkeýge alynǵan, onyń bireýi – jasóspirim.