SQO-da byltyr esirtki qylmysy úshin 126 adam jaýapkershilikke tartyldy

PETROPAVL. QazAqparat – Soltústik Qazaqstan oblysynda byltyr esirtki qylmysyna qatysty 250-ge jýyq derek tirkeldi, aınalymnan 421 kg astam túrli esirtki alyndy, dep habarlaıdy QazAqparat tilshisi.

SQO Esirtki qylmysyna qarsy is-qımyl basqarmasynyń bastyǵy Ivan Terzıdıdiń aıtýynsha, byltyr 241 esirtki qylmysy anyqtalsa, sonyń 17-si esirtkini asa iri kólemde saqtaýǵa qatysty. 12 derek kontrabandaǵa jáne 89-y esirtki zattaryn satýǵa baılanysty. Nátıjesinde aınalymnan 421 kg 716 gr esirtki, sonyń ishinde 3 kg 500 gr sıntetıkalyq esirtki alyndy.

126 adam qylmystyq jaýapkershilikke tartyldy.

«Byltyr Almatydan jáne Astanadan Petropavlǵa sıntetıkalyq esirtkini jetkizýdiń eki joly kesildi. Sondaı-aq oblysta esirtkini qoldan jasap kelgen zerthana anyqtalyp, joıyldy. 22 jastaǵy jigit ózi sıntetıkalyq esirtki jasaýdy úırenip, ınternet dúken ashqan. Jedel shara barysynda satýǵa daıyn turǵan 200 dozalyq 60 túıinshek «spaıs» alyndy. Sondaı-aq ony jasaýǵa arnalǵan kerek-jaraǵy tárkilendi», - deıdi Ivan Terzıdı.

Polıtseıdiń aıtýynsha, búginde esirtki qylmysyna qatysty jaza kúsheıtilgen. Biraq bul da toqtaý salmaı otyr.

«Byltyr qylmystyq jaýapkershilikke tartylǵan 126 adamnyń 58-i – 16 men 25 jas aralyǵyndaǵy jastar. Jartysyna jaqyndap kelemiz. Máselen 2016-17 jyldary qylmystyń bul túrimen ustalǵan bul jastaǵylardyń úlesi 5-10% aspaıtyn», - deıdi basqarma bastyǵy.

Statıstıkalyq málimetterge sáıkes, SQO-da esirtkige táýeldi 498 adam bar, onyń ekeýi – jasóspirim.

Polıtsııa tarapynana júrgizilip jatqan túrli is-shara, aktsııa, kezdesýlerdiń nátıjesinde byltyr jasóspirimder arasynda esirtkini mólsherden tys paıdalaný faktileri onyń aldyndaǵy jylmen salystyrǵanda eki ese azaıyp otyr.