SQO-da byltyr bos jatqan 8 myń gektarǵa jýyq jer memleketke qaıtaryldy

PETROPAVL. QazAqparat – Soltústik Qazaqstan oblysynda paıdalanylmaı jatqan jerge qatysty byltyr 153 zańbuzýshylyq anyqtalyp, 7528 ga jer májbúrli túrde sot arqyly alyndy, dep habarlaıdy QazAqparat tilshisi.

SQO Jer ınspektsııasy basqarmasynyń málimetinshe, 2019 jyly 626,7 myń ga aýmaqta 256 tekseris júrgizilgen. Onyń jartysynan astamynda egistik jáne jaıylymdyq jerlerdiń bos jatqandyǵy anyqtaldy. Nátıjesinde 8 ýchaske boıynsha is sotqa deıin jetip, 946 ga egistik jáne 6 582 ga jaıylymdyq jer memleket menshigine qaıtaryldy.

«Qazaqstan Ǵarysh Sapary» UK» AQ taldaýy boıynsha, Aıyrtaý aýdanynda 37,6 myń ga, Aqjar aýdanynda 22,8 myń ga, M.Jumabaev aýdanynda 19,6 myń ga, Taıynsha aýdanynda 19 myń ga egistik alqabynyń bos jatqandyǵy anyqtaldy. Eń kóp bos jatqan jaıylymdyq jer Ýálıhanov aýdanynda – 199,9 myń ga. Aıyrtaý aýdanynda 91,7 myń ga, al Qyzyljar aýdanynda 72,3 myń ga jaıylym bos jatyr.

Ǵaryshtyq barlaý men aýdandyq jergilikti atqarýshy bılik usynǵan málimetterde alshaqtyq bar. Sol sebepti aýdandar óz jumystarynda ǵaryshtyq monıtorıng maǵlumattaryn qoldanýlary qajet», - SQO Jer ınspektsııasy basqarmasynyń jetekshisi Beıbitbek Jaılybaev.

Jergilikti atqarýshy bılik pen olardyń qurylymdyq bólimderi qabyldaǵan sheshimderdiń zańdylyǵy boıynsha 68 tekseris júrgizildi. Nátıjesinde 49 zańbuzýshylyq anyqtaldy, bul kórsetkish ótken jylmen salystyrǵanda úsh ese kóp.

«Ókinishke qaraı óreskel zańbuzýshylyqtarǵa jol berilgen. Máselen jer ýchaskeleri eshqandaı baıqaý, aýktsıondarysyz ońdy-soldy taratylǵan. Budan basqa jer ýchaskeleri bas josparda bekitilmeı nemese eldi mekenderdiń damý jáne qurylys salý syzbasynyń joqtyǵyna qaramastan usynylǵan. Eń kóp taraǵan olqylyq – jer ýchaskesin berý týraly ótinishhatty qaraý merzimin saqtamaý», - deıdi Beıbitbek Jaılybaev.

Tekseristiń qorytyndysy boıynsha zańbuzýshylyqtardy joıý jóninde 36 uıǵarym shyǵaryldy.

Qazirgi ýaqytta Jer ınspektsııasy basqarmasy men jergilikti atqarýshy organdardyń ınspektorlary 532 myń ga jermen jumys istep jatyr. Onyń 184 myń ga Ýálıhanov aýdanyndaǵy «Agrofırma Kzyltý NAN» JShS tıesili. Seriktestik 102 myń egistik alqapty jáne 82 myń ga jaıylymdy ne ózi paıdalanbaı, ne basqalarǵa bermeı ustap otyr.

Mamandardyń aıtýynsha, mamyr aıynda sońǵy tekseris júrgiziledi. Osy ýaqytqa deıin agroqurylym tıisti jumys atqarmasa, jerdi májbúrli túrde qaıtarý boıynsha is-sharalar qolǵa alynbaqshy.