SQO-da buzaýlardyń ımmýnıtetin kúsheıtý úshin sýspenzııa óndirilýde

PETROPAVL. QazAqparat - Shal aqyn aýdanynyń Aqanbaraq aýylynda aýylsharýashylyq janýarlary men qustary úshin ınnovatsııalyq jemdik qospalardy óndiretin shaǵyn tseh ashyldy, dep habarlaıdy QazAqparat tilshisi.

Óńirlik kommýnıkatsııa qyzmetinen málim etkendeı, «Ásem» sharýa qojalyǵy janýarlardyń ımmýnıtetin kóteretin sýspenzııa daıyndap jatyr.
Sharýa qojalyǵynyń dırektory Asan Atymbaevtyń aıtýynsha, sýspenzııany ázirleý úshin sý, jylý jáne jaqsy jaryq kerek.

«Biz bıoreaktorlarda hlorellany ósiremiz. Ol aqýyzǵa, B dárýmenderi men mıkroelementterge baı», - dedi A. Atymbaev. Fermerdiń aıtýynsha, iri qara maldy ósirý kezinde jańa týǵan buzaýlardyń ishiniń ótýi qıyndyq týdyrady. Hlorella maldyń ımmýnıtetin kúsheıtip, aýrýǵa em bola alady. Buzaýǵa kúnine bir-eki lıtr sýspenzııa berse, jetkilikti. Bir lıtrdiń ózindik baǵasy 100-150 teńge aralyǵynda bolady.



«Qurylǵylar men tehnologııany Qazannan ákeldik. Tsehta 4 adam jumys jasaıdy. Hlorella ósirýmen aınalysatyn eki maman arnaıy oqýdan ótip jatyr. Jobany «Bıznestiń jol kartasy-2020» baǵdarlamasy arqyly iske asyrý úshin ótken jyly 2,5 mıllıon teńge kóleminde grant jeńip aldyq. Jalpy 3,5 mıllıon teńge qarjy jumsaldy», - dedi A. Atymbaev.

«Ásem» sharýa qojalyǵy 300 bas jylqy, 980 qoı jáne 260 iri qara mal ósiredi. 40-tan astam adam jumys jasap jatyr. Asan Atymtaev memlekettik baǵdarlama boıynsha 100 sútti golshtın-frız tuqymdy sıyr ákelýdi josparlap otyr.