SQO-da brakoner 2 jyl boıy zańsyz jaýapkershilikten bosatylǵan

<p>PETROPAVL. KAZINFORM &ndash; Soltústik Qazaqstan oblysynyń mamandandyrylǵan tabıǵatty qorǵaý prokýratýrasy brakonerdi jaýapkershilikten bosatý faktisin anyqtady. Óńir turǵyny sibir eligin atyp alyp, memleketke 1,2 mln teńge shyǵyn keltirgen.</p>

SQO prokýratýrasynyń málimetinshe, brakoner 2022 jyly qolǵa túsip, qylmystyq qýdalaý organy sotqa deıingi tergep-tekserýdi bastaǵan. Onyń nátıjesi boıynsha qylmystyq quqyq buzýshylyq quramyn tappaı, sotqa deıingi tergep-tekserý toqtatylǵan.

Janýarlar álemine keltirilgen zalal 1,2 mln teńgeni qurady, alaıda qylmystyq qýdalaý organy zalaldy óteý jáne zań boıynsha brakonerdi jazalaý jónindegi sharalardy 2 jyl ishinde qabyldamaǵan.

«Prokýratýra zańsyz toqtatylǵan sotqa deıingi tergep-tekserýdi qaıta bastap, Qazaqstan Respýblıkasy qylmystyq-protsestik kodeksiniń 35-babynyń 9-bóligi negizinde kináli adam ákimshilik jaýapkershilikke tartyldy. Prokýrorlyq qadaǵalaý aktisi boıynsha ýákiletti organ 1,2 mln teńge somasynda janýarlar álemine keltirilgen zalaldy óteý týraly talap aryzben sotqa júgindi», - delingen SQO prokýratýrasy taratqan aqparatta. 

12 shildede aýdandyq sot zalaldy tolyq kólemde óteý týraly talapty qanaǵattandyrdy. Sot sheshimi zańdy kúshine engen joq.

Buǵan deıin Petropavl qalasy prokýratýrasy tekserisi barysynda balabaqshalarǵa azyq-túlik kóterilgen baǵamen alynyp kelgendigin jazǵan edik.