SQO-da boranda elsiz dalada qalyp qoıǵan júrgizýshi 12 saǵat kómek kútti

PETROPAVL. QazAqparat – Soltústik Qazaqstan oblysy Ǵabıt Músirepov atyndaǵy aýdanda sút tasıtyn júk kóligi qalyń qarda batyp qalyp, 12 saǵattan astam ýaqyt boıy jolda turǵan, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, qańtardan 3-nen 4-ne qaraǵan túni «Ekaterınbýrg-Almaty» avtojolynyń 780 shaqyrymynda tsısternasy bar «KamAZ» borannyń saldarynan jol shetine túsip ketken.

Rýlde 54 jastaǵy júrgizýshi bolǵan. Ol sút áketý úshin Petropavldan Vozvyshenka eldi mekenine jolǵa shyqqan eken.

Qarda batyp turǵan júk kóligi jaıly polıtsııa qyzmetkerlerine jol tehnıkasynyń júrgizýshisi aıtqan.

Alaıda oǵan kómektesý úshin borannyń basylǵanyn kútýge týra keldi.

Patrýldik polıtsııa batalonynyń qyzmetkerleri tańǵa deıin jaqyn mańda bolyp, jol qozǵalysy qaýipsizdigin qamtamasyz etti.

Keıin jergilikti «Vozvyshenskoe» JShS kómek surady. Kásiporyn basshylyǵy shynjyrtaban traktor, ekskavator jáne 2 júk tıegish jiberdi.

Túske jaqyn, tek jarty táýlikten keıin ǵana júk kóligi qar qursaýynan shyǵaryldy.

«Qolaısyz aýa raıynda júrgizýshiler alys saparǵa shyǵýdan bas tartyp, eldi mekennen alysqa uzamaǵany jón. Sondaı-aq, avtokóliktiń tehnıkalyq jaǵdaıyn tekserip, qashyqtyq pen jyldamdyq rejımin saqtaý kerek, qutqarý qyzmetiniń habarlamalaryn baqylap otyrý qajet. Aýa raıy nasharlaǵan jaǵdaıda oblys joldarynda qozǵalys shekteledi», - deıdi SQO PD patrýldik polıtsııa batalonynyń komandıri Ýálıhan Orazalın.

Polıtseıler jol jabylǵany týraly eskertýdi elemeı, jolǵa shyqqan júrgizýshilerge ákimshilik jaýapkershilik bar ekenin eske salady.

Foto: SQO polıtsııa departamenti baspasóz qyzmeti