SQO-da bódene fermasyn ashqan otbasy eki jylda taza tabysqa qol jetkizbek

<p>Soltústik Qazaqstan oblysy Qyzyljar aýdany Beskól aýylyndaǵy Saǵıtovtar otbasy shaǵyn bódene fermasyn ashty. Kásipti endi bastaǵan erli-zaıypty quıylǵan ınvestıtsııa eki jyldan keıin óz jemisin berip, ferma taza paıda ákeletinine senim artyp otyr. <a href="https://kaz.inform.kz/news/esirtkige-jol-joq-astanada-esrtkge-karsi-aktsiya-otkzld-898547/Kazinform" target="_blank" rel="noopener">Kazinform</a> tilshisi kásipker Radık Saǵıtovpen suhbattasyp, bódene ósirýdiń qyr-syry, jańadan ashylǵan fermanyń búgingi jaı-kúıi týraly surady.&nbsp; &nbsp;</p>

«Bul bódene fermasy – «Aýyl amanatynyń» jemisi» dep bastady áńgimesin otaǵasy Radık Saǵıtov. Olar jubaıy ekeýi osy baǵdarlama aıasynda 5 jyl merzimge jyldyq mólsherlemesi 2,5% bolatyn nesıe alǵan. 

«Jobanyń jalpy quny shamamen 14 mln teńgeni qurady. Bizge «Aýyl amanaty» baǵdarlamasy kómektesti. «Soltústik» ÁKK» AQ tolyq aqparat berip, qoldaý kórsetti. Qajetti qujattardy jınap, nesıe aldyq. Bódene fermasynyń paıdasy joǵary, ónimge qashanda suranys bar, ári otbasylyq bıznes, ózimiz tutynamyz», - deıdi Radık Saǵıtov. 

Foto: Kazinform / Olesıa Jýkoven

Shaǵyn bódene fermasy úı mańynda ornalasqan. Onda 1,5 myń qusty ósirip, baptaýǵa bolady. Arnaıy eskızben qajetti jabdyqtardy jergilikti kompanııa jasap bergen. Jeldetý, jylytý jáne jemazyq berý avtomattandyrylǵan. 

«Biz barlyq kezeńnen ótemiz dep sheshtik. Sol úshin árqaısysyna 200 jumyrtqa sııatyn 3 ınkýbator aldyq. 17 kúnde balapan shyǵady. Keıin arnaıy orynda 21 kún ósip jetiledi. Al 46 kúnnen keıin jumyrtqalaı bastaıdy. Qazir fermada tehastyq jáne estonııalyq 300-ge jýyq bódene bar. Olardy birge ustaýǵa bolady», - deıdi kásipker. 

Radık Saǵıtovtyń aıtýynsha, bir bódene aıyna 25 jumyrtqa beredi. 

«Qazirgi mindet – fermany mekıendermen toltyrý. Tolyq qýatyna kóshken kezde kúnine 1 500-ge deıin jumyrtqa alamyz. Ónimdi ótkizýde másele týyndamaıdy, Petropavldaǵy iri sýpermarkettermen, jergilikti meıramhanalarmen kelisimshartymyz bar», - deıdi ol. 

Foto: Kazinform / Olesıa Jýkoven

Aıta keteıik, aýyl halqynyń tabysyn arttyrýǵa baǵyttalǵan «Aýyl amanaty» baǵdarlamasyn SQO-da iske asyrýǵa respýblıkalyq bıýdjetten 1,8 mlrd teńge bólingen. Óńirde baǵdarlamanyń operatory – «Soltústik» ÁKK» AQ. Bıyl SQO turǵyndary osy jobanyń ıgiligin kórý úshin 250 ótinim bergen.