SQO-da bıyl jiti ishek ınfektsııasymen 151 adam aýyrdy

PETROPAVL. QazAqparat – Soltústik Qazaqstan oblysynda bıylǵy jarty jylda 151 adam jiti ishek ınfektsııasyn juqtyrǵan. Bul dert juqpaly aýrýlardyń ishinde taralýy jaǵynan tumaý men jiti respıratorlyq ınfektsııalardan keıin úshinshi orynda keledi, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń ınfektsııalyq jáne parazıttik aýrýlardy epıdemıologııalyq qadaǵalaý bóliminiń basshysy Saltanat Bekqojınanyń aıtýynsha, bıyl syrqattanǵan 151 adamnyń 48-i – 14 jasqa deıingi bala. Jalpy, syrqattanýshylyq ótken jyldyń sáıkes kezeńimen salystyrǵanda ózgerissiz qalyp otyr.

«Jiti ishek ınfektsııalary osy ýaqytqa deıin ınfektsııalyq patologııada jetekshi oryn alady. Jiti ishek ınfektsııasy – patogendik, ıaǵnı shıgella, salmonella, t.b. jáne shartty-patogendik bakterııalardan, proteı, klebsıella, klostrıdııa jáne t.b., vırýstardan -rota-, astro-, Norfolk toptary, t.b. jáne qarapaıymdylardan -ameba, lıamblııa, krıptosporıdııa jáne t.b. týatyn ınfektsııanyń enteraldy mehanızmi bar adamnyń juqpaly aýrýlarynyń úlken toby. Іshek ınfektsııasy jyldyń kez kelgen ýaqytynda, sonyń ishinde kóbinese vırýstyq – sýyq mezgilde, bakterııalyq – jyly mezgilde kezdesedi», - deıdi Saltanat Bekqojına.

Kúnniń ysýy mıkroorganızmderdiń kóbeıýine qolaıly áser etedi. Saldarynan ótkir ishek ınfektsııalarymen aýyrý jıileıdi. Ásirese, balalar ishek ınfektsııalaryna beıim, óıtkeni balalar ashyq aýada kóbirek ýaqyt ótkizedi, qoldarynyń kir ekendigin umytyp, jemisterdi jýmaı, qaınatylmaǵan sý iship, syrtta tamaqtanýdy jón kóredi. Al, jyly jerde qaldyrylǵan taǵamdarda aýrý týdyratyn mıkroaǵzalar tez kóbeıedi.

«Infektsııa kózi – aýrý adamdar men bakterııa tasymaldaýshylar. Іsh ótý kúnine 5 retten jıi bolǵanda, birneshe ret qusyp, nájiste qan paıda bolsa, ishtiń aýyrýy, álsizdik pen shóldeý baıqalsa birden dárigerge kóringen jón. Іshek ınfektsııalarynda dene temperatýrasynyń joǵarylaýy jıi kezdesetin, biraq mindetti emes kórinisi», - deıdi sanıtar dáriger.

Mamannyń aıtýynsha, balalardaǵy jiti ishek ınfektsııalarynyń aldyn alý úshin jeke gıgıena erejelerin qatań saqtap, qoldy sabynmen jıi jáne muqııat jýýdy ádetke aınaldyrý qajet. Ásirese, tamaqtanar aldynda jáne dárethanaǵa barǵannan keıin qoldy jýý kerek.

«Qaınatylǵan, bótelkedegi nemese sapaly sýdy qoldanyńyz. Kókónisterdi, jemisterdi, jıdekterdi aǵyndy sý astynda qoldanar aldynda muqııat jýyńyz. Kezdeısoq adamdardan nemese ruqsat etilmegen saýda oryndarynan azyq-túlik satyp almańyz. Ystyq jáne sýyq taǵamdardy daıyndaý kezinde gıgıena erejelerin saqtaý, ásirese tez buzylatyn taǵamdar, shıki taǵamdar men daıyn taǵamdardy bólek saqtaýdy umytpaý. Taǵamdardy, ásirese et, qus eti, jumyrtqa jáne teńiz ónimderin muqııat qýyryp baryp paıdalaný, jańa daıyndalǵan taǵamdy aldyńǵy kúnniń qaldyqtarymen aralastyrmaý, eger daıyn taǵam qalsa, ony kelesi kúni qoldanar aldynda termııalyq óńdeýden ótkizý – ishek ınfektsııasynyń aldyn alady. Qoqys pen tamaq qaldyqtaryn jınamańyz, shybyndar men taraqandardyń paıda bolýyna jol bermeńiz. Turǵyn úıdi únemi taza ustaý jáne jeke gıgıena erejelerin saqtaý, kishkentaı balalarǵa qaınatylmaǵan sút, shıki jumyrtqa bermeý, tamaq daıyndaý úshin tek sapaly ónimderdi paıdalaný – ádetke aınalýy tıis», - deıdi Saltanat Bekqojına.