SQO-da bıyl jańadan 12 myń jumys orny ashyldy
Saılaýaldy ýádelerdi iske asyrý barysy týraly «Nur Otan» partııasy óńirlik fılıaly Saıası keńesi Bıýrosynyń músheleri aıtty. Qujatqa sáıkes, bıyl jospar boıynsha 13,6 myń jumys orny qurylýy tıis edi, onyń 12 myńy ashyldy. Sonymen qatar, ortasha aılyq eńbekaqy 178 myń teńgeni qurady.
«Nur Otan» partııasynyń saılaýaldy baǵdarlamasyn iske asyrý jónindegi jol kartasyna 7 baǵyt boıynsha 129 is-shara kirgen. Bıyl onyń 117-sin iske asyrý josparlanǵan. Nátıjesinde óńirde lamınattalǵan faner óndiretin kombınat, jumsaq konteınerler shyǵaratyn fabrıka jáne ızotermııalyq termos vagondar zaýyty iske qosyldy. Qazir «Radýga» kompanııasy qaǵaz shyǵaratyn fabrıkany, «Kırpıch SK» JShS-i kirpish zaýytyn salyp jatyr.
«Qyzyljar» arnaıy ekonomıkalyq aımaǵynda 3 iri joba iske asyrylady. Memleket basshysynyń qatysýymen elektrli tehnıkalyq zaýyttyń transformatorlyq jabdyǵyn tehnıkalyq iske qosý júrgizildi. Budan basqa básekege qabiletti ónim túrlerin shyǵarý úshin «Taıynsha Maı» JShS, «Radýga» JShS jáne «Maksımalnyı razmah CORPORATION» JShS jańǵyrtylyp jatyr. Tartylǵan ınvestıtsııa shamamen 3 mlrd teńgeni quraıdy, 200-den astam jańa jumys orny qurylady», - deıdi SQO ekonomıka basqarmasynyń basshysy Qýanyshbek Qalıjanov.
Oblystyń ónerkásip sektory bıyl 221 mlrd teńgeniń ónimin shyǵardy. Agrarlyq sektorda da ósim baıqalady, onda et jáne sút óndirisi tıisinshe 2,4 %-ǵa jáne 6,1 %-ǵa ulǵaıdy.
«Jol kartasy aıasynda osy jyly 10 sút fermasy iske qosylady, 13 myń basqa arnalǵan eki bordaqylaý alańy, jylyna 6 myń tonna broıler etin óndiretin 2 qus fabrıkasy salynyp jatyr», - deıdi Qýanyshbek Qalıjanov.
Turǵyn úı qurylysynyń kólemi artqan. Bul baǵytqa 27 mlrd teńge bólindi, bul 3,5 myń páter salýǵa múmkindik berdi. Búginge deıin 775 páter paıdalanýǵa berildi, jyl sońyna deıin taǵy 30 kópqabatty turǵyn úı qoldanysqa enedi.
Bıyl medıtsınalyq jabdyqtardy jańartýǵa 3 mlrd teńgeden astam qarajat bólindi. Aýrýhanalar zamanaýı MRT apparattarymen, kompıýterlik tomografpen, sandyq mammograftarmen, saraptamalyq klastaǵy ÝDZ, rentgen jáne angıograftarmen tolyqty.
«2021 jyly jergilikti bıýdjet esebinen oblystyń 5 medıtsınalyq uıymynda jalpy somasy 143 mln teńgege kúrdeli jóndeý júrgizile bastady. Ooblysta 2 zamanaýı dene shynyqtyrý-saýyqtyrý kesheni ashyldy, taǵy beseýiniń qurylysy bastaldy. Jyl sońyna deıin 2 hokkeı kesheni ashylady», - deıdi ekonomıka basqarmasynyń basshysy.
Budan basqa 4,1 myń jas jumysqa ornalastyryldy, óz isin ashýǵa 411 shaǵyn nesıe berildi.
«Nur Otan» partııasy oblystyq fılıalynyń tóraǵasy, SQO ákimi Qumar Aqsaqalov saılaýaldy baǵdarlamanyń oryndalýyna qatań monıtorıng júrgizý qajettigin atap ótti. Onyń aıtýynsha, Jol kartasyn júzege asyrý jumystaryna barlyq atqarýshy organdar qosylýy kerek.
«Jol kartasyn oryndaý boıynsha jumysty júıeli monıtorıngileý úshin jaýapty memlekettik organdy aıqyndaý qajet, ol jol kartasynyń baǵyttary boıynsha barlyq qajetti aqparatty jınaqtap, ony maǵan jáne partııanyń oblystyq fılıalyna turaqty negizde usynatyn bolady. Men bul jumysty ekonomıka basqarmasyna tapsyramyn», - dep atap ótti Qumar Aqsaqalov.