SQO-da bıyl orta ǵasyr dáýirin zertteýge qatysty aýqymdy jumys bastalmaq

PETROPAVL. QazAqparat – Soltústik Qazaqstan oblysynyń ejelgi tarıhyn jan-jaqty, tereń zertteý maqsatynda respýblıkadaǵy tanymal ǵylymı-zertteý ınstıtýttarynyń eki fılıaly ashylyp, jumys istep jatyr, dep habarlaıdy QazAqparat tilshisi.

Sh.Ýálıhanov atyndaǵy tarıh jáne etnologııa ınstıtýtynyń jáne Á.Marǵulan atyndaǵy arheologııa ınstıtýtynyń fılıaldary jergilikti joǵary oqý ornynda – M.Qozybaev atyndaǵy Soltústik Qazaqstan ýnıversıtetiniń janynan ashylǵan.

«Byltyr tarıhshylardyń respýblıkalyq sezi Petropavlda ótti. Sol jıynda bizdiń ýnıversıtette elimizdiń jetekshi ǵylymı-zertteý ınstıtýttarynyń fılıaldaryn ashý bastamasyn kóterdik. Bizdiń usynysymyzdy mınıstr qoldady. Bul elimizdegi óńirlik ýnıversıtetter arasynda jaqsy jańalyq.

Bizdiń joǵary oqý ornynyń materıaldyq bazasy aıtýǵa turarlyq, sondaı-aq, akademık Manash Qozybaevtyń atyn ıelengen. Sol sebepti tarıhı, etnologııalyq, arheologııalyq salany Soltústik óńirde damytý biz úshin mańyzdy», - deıdi Basqarma tóraǵasy – rektordyń keńesshisi, tarıh ǵylymdarynyń doktory Aqmaral Ybyraeva.

Jeltoqsan aıynda eki fılıal resmı túrde ashyldy. SQO-ny zertteýge baǵdarlamalyq-maqsatty qarjylandyrýǵa ótinish berip, konkýrsty jeńip aldyq. Mol qarajat bólindi. Bıyl aýqymdy jumys bastalady.

«Maqsat, árıne, óńir tarıhyn, arheologııalyq eskertkishterin, mádenıetti tereń zertteý. Alǵashqy arheologııalyq ekspedıtsııanyń qurylǵanyna 60 jyldan astam ýaqyt ótse de, 90 jyldary qarajattyń joqtyǵynan bul jumys toqtap qaldy. Endi arheologııalyq zertteýlerdi jandandyratyn, jańa deńgeıge shyǵaratyn ýaqyt jetti.

Bizdiń ǵalymdar - Vıktor Zaıbert, Anatolıı Pleshakov óńirde tas, qola, erte temir zamanyn óte jaqsy zerttese, ókinishke oraı, orta ǵasyr dáýiri qalyp qoıǵan. Ásirese kenje qalǵan bizdiń zamanymyzǵa deıingi V-VI ǵasyrlardan bastaý alatyn Túrki kezeńi, odan keıin Altyn orda dáýiri, XV-XVI ǵasyrlarda qazaq handyǵynyń qurylý kezeńi – osy aralyqtyń barlyǵyn qamtyp, zertteý qajet.

Osyǵan baılanysty fılıal ashylýyna uıytqy boldyq, bul bizge basqa óńirlerdiń arheolog ǵalymdaryn tartyp, ólke tarıhyn tereńinen, jan-jaqty zertteýge múmkindik bermek.

Biz áriptesterimizben birge jańalyqtar ashamyz degen senimdemin. Nátıjesin halyqaralyq jýrnaldarda, respýblıkalyq basylymdarda jarııalaý mindeti tur», - deıdi Aqmaral Ybyraeva.

Fılıal josparly túrde jumys isteýi úshin Almatydan Á.Marǵulan arheologııa ınstıtýtynyń dırektory, ǵalym Aqan Ońǵaruly bastaǵan delegatsııa keldi. Bul sapar barysynda jumys jospary naqtylanbaq.