SQO-da bıyl ońtústikten qonys aýdarǵandarǵa 700-den astam turǵyn úı salynady

PETROPAVL. QazAqparat – Soltústik Qazaqstan oblysynda bıyl jumys kúshi tapshy óńirlerdi qamtamasyz etýdi maqsat etken memlekettik baǵdarlama aıasynda 714 turǵyn úı salynbaq, dep habarlaıdy QazAqparat tilshisi.

SQO Jumyspen qamtýdy úılestirý jáne áleýmettik baǵdarlamalar basqarmasynyń málimetinshe, memlekettik baǵdarlamaǵa Almaty, Jambyl, Mańǵystaý, Túrkistan, Qyzylorda oblystarynyń jáne Nur-Sultan, Shymkent, Almaty qalalarynyń turǵyndary qatysyp, soltústik óńirlerge kóshe alady.

«Otbasynyń ár múshesine 35 AEK mólsherinde sýbsıdııa beriledi. Turǵyn úıdi jaldaý jáne kommýnaldyq qyzmetterdi tóleý boıynsha shyǵyndary óteledi. Bul tólem otbasy quramy men qonystaný ornyna baılanysty, mysaly qalada: 20-30 AEK, aýyldyq jerde 15-21 AEK tólenedi. Qonys aýdarýǵa járdem kórsetetin jumys berýshilerge sýbsıdııalar tólenedi. ıAǵnı, 5 adamnan artyq qabyldaǵan jumys berýshige ár adam úshin 450 AEK – 1 mln 192 myń teńge beriledi. Qajet bolǵan jaǵdaıda tehnıkalyq jáne kásiptik bilimi bar jáne qysqa merzimdi kásibı kýrstarǵa joldama qarastyrylǵan. Sondaı-aq jańa turǵylyqty jerde jumysqa ornalasýǵa jáne kásipkerlikti damytýǵa járdem kórsetiledi», - deıdi basqarma mamandary.

SQO-da qonys aýdarýshylar men oralmandar úshin pılottyq rejımde turǵyn úı qurylysy júzege asyrylyp jatyr. Keıin baspanalar satyp alý quqyǵymen jalǵa beriledi. Byltyr osy maqsatta 428 úı turǵyzylyp, paıdalanýǵa berildi. Jospar boıynsha 2020 jyly 714 baspana salynady. Bul úıler barlyq aýdandarda boı kótermek.

Byltyr jumys kúshi kóp óńirlerden jumys kúshi tapshy oblystarǵa jalpy sany 2223 adam bolatyn 736 otbasy qonys aýdarǵan. 2020 jyly qonys aýdarýshylardy qabyldaýdyń óńirlik kvotasy 1465 adamǵa belgilengen, ıaǵnı 413 otbasy kelýi tıis.