SQO-da bıyl malyn bos jibergen 700-den astam turǵyn jaýapkershilikke tartyldy

PETROPAVL. QazAqparat – Soltústik Qazaqstan oblysynda jyl basynan beri malyn qaraýsyz jibergen 722 turǵynǵa ákimshilik hattama toltyryldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 12 mamyrǵa qaraǵan túni Aıyrtaý aýdany «Elenovka-Chıstopole» jergilikti mańyzy bar avtojolda jylqy kenetten trassa ústine shyǵyp ketken. Saldarynan túlikti Kókshetaý qalasynyń 59 jastaǵy turǵyny basqarǵan «Ford» kóligi soqqan. Júrgizýshi jıenimen birge úıine qaıtyp kele jatqan eken. Ekeýi de zardap shekken joq. Al soqqydan avtokólik zaqymdanyp, janýar sol jerde mert boldy.

Erkin jaıylymǵa jol bergen shopanǵa qatysty QR Ákimshilik quqyq buzýshylyq týraly Kodekstiń 408-babynyń 2-bóligi boıynsha hattama toltyryldy.

«Jaz – demalys maýsymy, ádette qala syrtyndaǵy trassalarda kólik aǵyny artady. Sondyqtan jol-kólik oqıǵalardyń aldyn alý jol qaýipsizdigin nyǵaıtýdyń mańyzdy quramdas bóligi. Ýchaskelik polıtsııa ınspektorlary kólik júrgizýshilerine qaýip tóndiretin jáne mal urlyǵyna jaǵdaı jasaıtyn erkin jaıylymǵa jol bermeý úshin aldyn alý jumysyn júrgizedi. Jyl basynan aýdan aýmaǵynda qańǵyrǵan malǵa qatysty 56 hattama toltyryldy», - deıdi Aıyrtaý aýdandyq polıtsııa bóliminiń bastyǵy Marat Serkeshev.

Jalpy jyl basynan SQO-nyń 722 turǵyny malyn bos qoıa bergeni úshin jaýapkershilikke tartyldy.