SQO-da bıyl ınternet arqyly alaıaqtyq jasaǵan 32 adam qylmystyq jaýapkershilikke tartyldy

PETROPAVL. QazAqparat – Soltústik Qazaqstan oblysynda polıtseıler ınternet alaıaqtyqtyń shamamen 14 % azaıǵanyn aıtty. Desek te bıyl qylmystyń osy túrine qatysty 32 adam jaýapkershilikke tartylǵan, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken brıfıngte polıtseıler SQO aýmaǵynda ınternet-alaıaqtyqtyń keń taralǵan shemalary týraly, qaskúnemderdiń qurbany bolmaý úshin qandaı sharalardy saqtaý qajet, sondaı-aq halyqtyń qarjylyq saýattylyǵyn arttyrý úshin qandaı is-sharalar júrgizilip jatqanyn aıtty.

Statıstıkalyq málimetterge sáıkes, SQO-da 5 jyl buryn 61 fakti tirkelse, byltyr ınternet alaıaqtyqtyń 781 deregi anyqtaldy. Bıyl 400 fakti esepke alyndy, bul ótken jyldyń uqsas kezeńimen salystyrǵanda 13,8% tómen.

«Alaıaqtardan kóbine oblys ortalyǵynyń turǵyndary zardap shegedi, bıyl 312 fakti tirkeldi. Taldaý kórsetkendeı, 40 pen 60 jas aralyǵyndaǵy adamdar olardyń tuzaǵyna túsedi. Kóbine olardy banktiń qyzmetkerimiz dep aldaıdy.

Alaıaqtyqtan zardap shekkenderdiń negizgi úlesi turaqty jumys isteıtin adamdar.

Al qylmyskerler - IT salasynda daǵdylary bar 20-35 jastaǵy adamdar», - deıdi SQO PD krımınaldyq polıtsııa basqarmasy bastyǵynyń orynbasary Madııar Harıpov.

Bıyl ınternet alaıaqtyq jasaǵany úshin 32 adam ustalyp, qylmystyq jaýapkershilikke tartyldy.Bul byltyrǵydan 10 adamǵa artyq. Qylmystyń bul túrine 4 jylǵa deıin bas bostandyǵynan aıyrý, aýyr sanattaǵy quqyq buzýshylyqtardy jasaǵany úshin 3 jyldan 7 jylǵa deıin jaza qarastyrylǵan.