SQO-da bıyl aýyl sharýashylyǵy tehnıkasy qurastyryla bastaıdy

PETROPAVL. QazAqparat – Soltústik Qazaqstan oblysynda bıyldan bastap nemistiń «CLAAS» kompanııasynyń aýyl sharýashylyǵy tehnıkasy qurastyryla bastaıdy, dep habarlaıdy QazAqparat tilshisi.

SQO ákimi Qumar Aqsaqalov áleýmettik jelidegi jeke paraqshasynda «CLAAS» kompanııasynyń joba úılestirýshisi Valdemar Prıbpen birge birlesken jobanyń júzege asý barysyn teksergenin jazdy.

«CLAAS» kontserni aýylsharýashylyǵy tehnıkasyn shyǵarý boıynsha álemdegi kóshbasshy kompanııa. Kompanııanyń búkil álem boıynsha 7 zaýyty bar: Germanııa, Frantsııa, AQSh, Qytaı, Reseı, Vengrııa jáne Ózbekstanda. Segizinshi zaýyt Qazaqstanda, atap aıtqanda Soltústik Qazaqstan oblysynda ashylady. Bul nemis áriptesterimen uzaq, biraq sátti kelissózderdiń nátıjesi», - dedi óńir basshysy.

Qazir Petropavlda jańa kásiporynǵa arnalǵan ǵımarat qaıta qalpyna keltirilip jatyr. «CLAAS» kompanııasynyń joba úılestirýshisi Valdemar Prıb bir apta boıy jobalaýshylar men qurylysshylardyń jumysyn úılestirip, óz usynystaryn engizdi.

«Barlyq qurylys jáne jóndeý jumystary maýsym aıynda aıaqtalady. 100-ge jýyq turaqty jumys orny qurylady. Nemis kontserni mamandardy tańdaý jáne daıyndaýmen de aınalysyp jatyr.

Bul bizdiń aımaq jáne búkil el úshin óte mańyzdy joba. Óńirde joǵary tabysty álemdik deńgeıdegi óndiris ashylady, al bizdiń sharýalar «CLAAS» kombaındary men traktorlaryn, «Horsch» tuqym sebý keshenderin 50 %-ǵa deıingi jeńildetilgen baǵamen satyp ala alady», - deıdi Qumar Aqsaqalov.

Kásiporyn eki aıdan keıin iske qosylmaq. Jospar júzege asqan jaǵdaıda, bıyl jyl sońyna deıin jańa zaýytta 100-ge jýyq kombaıyn qurastyrylmaq.