SQO-da bıyl «Ańsaǵan sábı» baǵdarlamasy aıasynda 40 sábı ómirge keldi

PETROPAVL. QazAqparat – Soltústik Qazaqstan oblysynda bıyl «Ańsaǵan sábı» baǵdarlamasy boıynsha 210 kvota bólindi. Jyl basynan ony 90-ǵa jýyq otbasy paıdalansa, 40 sábı ómirge kelip, shańyraqty qýanyshqa bóledi, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, «Ańsaǵan sábı» baǵdarlamasy boıynsha jyl basynan 40 náreste ómirge keldi. Sábı súıgenderdiń biri – petropavldyq Evgenııa Katına. 35 jastaǵy kelinshek 15 jyl boıy balaly bolýdy armandaǵan eken.

«Uldy boldym, qýanyshymdy aıtyp jetkize almaımyn. Baqyttymyn. Ulymnyń salmaǵy 3 kelige jaqyn», - deıdi jas ana Evgenııa Katına.

Byltyr soltústikqazaqstandyqtar «Ańsaǵan sábı» baǵdarlamasy aıasynda bólingen 217 kvotanyń 90 %-dan astamyn paıdalanǵan. Óńirge bıyl EKO protsedýrasyn tegin júrgizýge 210 kvota berilgen. Ony 90-ǵa jýyq otbasy paıdalandy.

Mamandardyń aıtýynsha, kómekti negizinen 30 - 35 jas aralyǵyndaǵy kelinshekter alǵan. Al jyl basynan beri SQO-da jasandy uryqtandyrýdyń nátıjesinde 40 sábı dúnıege keldi.

Búgin, Halyqaralyq balalardy qorǵaý kúni oblystyq perınataldyq ortalyqta 11 shaqalaq týdy. Olardyń altaýy er bala bolsa, beseýi – qyz. Búgin taǵy tolǵaǵy qysqan úsh áıel bosanyp, balasyn baýyryna almaq. Merekege oraı jas analardyń bárine bala kútimine qajet bolatyn syılyqtar berildi.

Ashyq kózderden alynǵan foto