SQO-da bıyl alıment tóleýden jaltarǵan 8 adam qylmystyq jaýapkershilikke tartyldy

PETROPAVL. QazAqparat – Soltústik Qazaqstan oblysynda bıyl alıment tóleýden qashqan 8 adam qylmystyq jaýapkershilikke tartylyp, olardyń beseýi sottaldy. Qalǵan úsheýi 4 mln teńgeden astam qaryzdy japqandyqtan jaýapkershilikten bosatyldy, dep habarlaıdy QazAqparat tilshisi.

SQO prokýrorynyń kómekshisi Rýstam Sadenovtyń aıtýynsha, alıment tóleýden jaltaryp, sol úshin sottalǵan bes adamnyń qaryzy 9 mln teńgeden asqan. Qylmystyq jaýapkershilikke tartylǵan taǵy úsh adamnyń 4 mln teńgeden astam bereshegi bolǵan. Olar boryshtan qutylǵandyqtan qylmystyq is toqtatyldy.

«Óńirde alıment tóleıtin 7519 adam bar. 175 boryshker alıment tóleýden jaltaryp júr. Búginde jalpy qaryz 166 mln teńgege jetken. QR Qylmystyq kodekstiń 139 baby boıynsha alıment tóleýden qashqandarǵa jaýapkershilik qarastyrylǵan.

SQO kámeletke tolmaǵandardyń ister jónindegi aýdanaralyq sottyń úkimimen L. esimdi adamnyń bas bostandyǵy 2 jylǵa shekteldi. Ol 10 aı boıyna balasyna alıment tólemegen, qaryzy shamamen 1,6 mln teńgege jetti», - deıdi Rýstam Sadenov.

Qazirgi ýaqytta 6 aı qatarynan balasyna qatysty mindetti oryndamaǵan 13 boryshkerge qatysty qylmystyq is boıynsha sotqa deıingi tergeý júrgizilip jatyr. Olardyń jalpy bereshegi 16 mln teńgeden asyp ketken.