SQO-da bıyl 7 adam ıis tıip ýlandy

PETROPAVL. QazAqparat – Soltústik Qazaqstan oblysynda 4 myńnan astam jeke turǵyn úı órt sóndirýshilerdiń esebinde tur. Halyqtyń áleýmettik osal toptaryna jatatyn olardyń jartysyna jýyǵyna órtke qarsy datchıkter ornatylǵan, dep habarlaıdy QazAqparat tilshisi.

SQO tótenshe jaǵdaılar departamentiniń bastyǵy Ramıl Kamalovtyń aıtýynsha, esepke alynǵan 4 myńnan astam jeke turǵyn úıde 16 myńnan astam adam turady. Bul baspanalar únemi tekserilip turady. Osyndaı tekseristerdiń barysynda 2 myń úıden 3 myńǵa jýyq olqylyq anyqtaldy. Ol peshti jáne elektr qondyrǵylaryn durys qoldanbaýǵa qatysty.

«Peshti nemese elektr qondyrǵylaryn durys qoldanbaý órttiń shyǵýyna birden-bir sebep. Anyqtalǵan olqylyqtardyń basym bóligi joıyldy. Áleýmettik qater tobyna jatatyn turǵyndardyń úılerine 1 933 órtke qarsy datchık ornatyldy. Osylaısha 46 %-y qamtyldy. Oblystyń alty aýdanynda bul jumys tolyq aıaqtaldy. Qondyrǵylardy ornatýdan nátıje bar. Eki kóp balaly otbasy osy qurylǵylardyń arqasynda aman qaldy», - deıdi departament bastyǵy.

Bıyl óńirde kómir qyshqyl gazyna ýlanýshylar qatary artqan. Jyl basynan osyndaı 3 oqıǵa tirkelip, 7 adam jaraqattandy, solardyń bireýi bala. Byltyr 4 adam peshtegi aqaýdyń saldarynan ıis tıip, ýlandy.

Buǵan deıin SQO TJD bastyǵy Ramıl Kamalov turǵyn úı sektorynda bolǵan órtterdi sóndirý kezindegi qıyndyqtar jaıynda aıtqan edi.