SQO-da bıyl 60-qa jýyq qylmysty buryn sottalǵandar jasaǵan

PETROPAVL. QazAqparat – Soltústik Qazaqstan oblysynda bıyl sottylyǵy alynbaǵan jáne jazasyn tolyq ótemegen adamdar qaıta qylmysqa baryp, osyndaı 59 fakti tirkeldi, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, qylmystyń qaıta jasalýyna jol bermeý, aldyn alý – polıtsııanyń profılaktıkalyq jumystarynyń mańyzdy baǵyttarynyń biri. Bul mindet ýchaskelik ınspektorlarǵa júktelgen.
Buryn sottalǵan adamdar tizimdik esepke alynǵan. Bas bostandyǵynan aıyrý oryndarynda ózin nashar kórsetkender resmı túrde qadaǵalanatyn adamdar retinde esepte turady. Quqyq buzýshylyq jasalǵan jaǵdaıda ákimshilik qadaǵalaý belgilenedi. Sot qadaǵalaýǵa alynǵan adam oryndaýǵa mindetti talaptardy taǵaıyndaıdy.
Shartty túrde merziminen buryn bosatylǵan adamdar úshin de osyndaı talaptar bar. Olarǵa ishimdikti ishýge tyıym salynǵan, eldi mekennen tys jerlerge shyqqan jaǵdaıda ishki ister organdaryn habardar etýge mindetteledi. Al shartty túrde merziminen buryn bosatylǵandar bul shekteýlerdi júıeli túrde buzǵan jaǵdaıda qaıtadan qamaýǵa alynýy múmkin.
Qańtar aıynan beri ýchaskelik polıtsııa ınspektorlary shartty túrde merziminen buryn bosatylǵan 14 adamǵa qatysty materıaldar jınady. Olar talapqa baǵynbaǵany úshin bas bostandyǵynan aıyrý oryndaryna qaıtaryldy, merzimniń qalǵan bóligin túzeý mekemesinde óteıdi.
«Jyl basynan beri oblysta sottylyǵy alynbaǵan jáne ótelmegen adamdar jasaǵan 59 qylmys tirkeldi. Onyń 34-i – urlyq, tórteýi – alaıaqtyq, úsheýi – tonaý. Bir qylmys esirtkini zańsyz satýǵa baılanysty.
Búgingi tańda SQO-da shartty túrde merziminen buryn bosatylǵan 244 adam, resmı túrde qadaǵalaýǵa alynǵan 312 adam jáne ákimshilik qadaǵalaýdaǵy 27 adam esepte tur. Árqaısysy qaıta qylmys jasamaýy úshin olarmen profılaktıkalyq jumys turaqty negizde júrgiziledi», - deıdi SQO PD JPQ basqarmasynyń bastyǵy Aıdyn Baımatov.