SQO-da bıyl 50-den astam maskúnem-nashaqor májbúrli túrde emdelýge jiberildi

PETROPAVL. QazAqparat – Soltústik Qazaqstan oblysynda jyl bastalǵaly elýden astam adam maskúnemdik pen nashaqorlyqtan májbúrli túrde emdelýge jiberilse, alkogoldi ishimdikterdi mólsherden artyq paıdalanatyn 500-ge jýyq adam polıtseılerdiń esebine alyndy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavlda ǵana jyl bastalǵaly beri zańsyz aınalymnan 1,5 myń lıtrden astam alkogol alyndy. Byltyr bir jylda 17 myń lıtrden astam zańsyz araq-sharap anyqtalyp, kózi joıyldy.

Budan basqa, qalalyq polıtseıler jyl basynan beri maskúnemdik pen nashaqorlyqtan májbúrlep emdeýge 17 adamdy jiberdi. Olar alty aıdan bir jylǵa deıin narkologııalyq mekemede em-dom alady.

«Qylmys, buzaqylyq, jol-kólik oqıǵalary kóbinese mas kúıdegi adamdarmen jasalady. Sonymen qatar, otbasyndaǵy urys-keris, janjalǵa da kóp jaǵdaıda araq kináli. Qylmystyń aldyn alý úshin ýchaskelik ınspektorlar maskúnem retinde esepte turǵandardy júıeli túrde tekseredi.

Jyl basynan beri SQO-da qoǵamdyq oryndarda mas kúıde júrýdiń 1735 faktisi, alkogol ónimin zańsyz satýdyń 68 faktisi anyqtaldy.

Jalpy, oblys boıynsha osy jyldyń basynan bastap maskúnemdik pen nashaqorlyqtan zardap shegetin 50-den astam adam emdelýge jiberildi.

Іshki ister organdary alkogoldik ishimdikterdi mólsherden tys paıdalanatyn 476 adamda esepke aldy», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.