SQO-da bıyl 5 mlrd teńgege zamanaýı medıtsınalyq qondyrǵylar alynbaq

PETROPAVL. QazAqparat – Soltústik Qazaqstan oblysyndaǵy aýdandyq emdeý mekemeleri 14 sanıtarlyq kólikpen tolyqty. Jańa jedel járdem mashınalary aýyl turǵyndaryna qyzmet kórsetetin bolady, dep habarlaıdy QazAqparat tilshisi.

SQO ákimi baspasóz qyzmetiniń málimetinshe, 14 jańa sanıtarlyq kólik Prezıdent bastamasymen aýyl turǵyndaryn medıtsınalyq ınfraqurylymmen qamtamasyz etýge baǵyttalǵan «Aýyldyq densaýlyq saqtaýdy jańǵyrtý» ulttyq jobasy aıasynda alyndy. Bıyl bastalǵan jobanyń arqasynda aýyldarda medıtsınalyq kómek sapaly ári qoljetimdi bolmaq.

«Bul mashınalar aýdandarǵa jiberilip, aýyl turǵyndaryna qyzmet etedi. Osynyń arqasynda oblystaǵy densaýlyq saqtaý salasyndaǵy kólikterdiń tozýy 73 %-dan 63 %-ǵa deıin tómendeıdi.

Bıyl taǵy osyndaı 10 kólik satyp alý josparlanǵan. Barlyǵy densaýlyq saqtaý júıesi boıynsha 45 kólikti aýystyrý qajet. Bul máseleni sheshý úshin kólik parkin jańartýdy jalǵastyramyz», - dedi SQO ákimi Aıdarbek Saparov,

Óńir basshysynyń aıtýynsha, Ulttyq joba aıasynda óńirde 46 medıtsınalyq mekeme salynbaq, olar: FAP, dárigerlik ambýlatorııa pen medpýnktter. Keshendi jospar boıynsha Ýálıhanov aýdanynyń ortalyǵy Kishkenekólde emhana salynady.

Sondaı-aq 2023 jyly densaýlyq saqtaý nysandaryna kúrdeli jóndeý jumystary júrgiziledi. Bul maqsatqa 1,5 mlrd teńge bólindi.

«Bıyl «Bereke» men «Jas órken» yqsham aýdandarynda 2 emhana ashamyz.

Jalpy, 2023 jyly oblys boıynsha medıtsınalyq qondyrǵylar alýǵa 5 mlrd teńge bólindi. Bul ótken jylmen salystyrǵanda 1,2 ese kóp. Bıyl angıograftar, ÝZI, endoskopııa, reanımatsııa jáne rentgen apparattary qoıylady.

Atap aıtsaq, kardıologııalyq ortalyq pen kópsalaly qalalyq aýrýhananyń ınsýlt ortalyǵyna eki angıograf ornatylady. Zamanaýı qondyrǵylar ınsýlt pen ınfarkt kezinde ota jasaýǵa arnalǵan», - dedi Aıdarbek Saparov.