SQO-da bıyl 49 eldi meken taza aýyz sýmen qamtylady

PETROPAVL. QazAqparat – Soltústik Qazaqstan oblysynda taza sý máselesin sheshýge bıyl el qazynasynan 11,4 mlrd teńge bólingen. Nátıjesinde aýyl halqynyń 83,5%-y aýyz sýmen qamtylmaq, dep habarlaıdy QazAqparat tilshisi.

SQO energetıka jáne turǵyn úı-kommýnaldyq sharýashylyǵy basqarmasynyń málimetinshe, qazir 247,5 myń turǵyny bar óńirdegi 398 eldi meken ortalyqtandyrylǵan sý jelisine qosylǵan.

Bul – barlyq aýyldardyń 62,7 paıyzy.

«Eldi mekenderdi sýmen jabdyqtaý jumysy jylda júrgiziledi. Byltyr osy maqsatqa respýblıkalyq bıýdjetten 6,5 mlrd teńge bólindi. 60 myńnan astam turǵyny bar 76 aýylǵa taza sý jetti. Sý taratý jelileri, toptyq sý qubyrlary jónge keltirilip, aýystyryldy. Sondaı-aq burynnan bar sý taratý jelilerin qalypqa keltirý boıynsha qyrýar jumys atqaryldy», - deıdi SQO energetıka jáne turǵyn úı-kommýnaldyq sharýashylyǵy basqarmasynyń basshysy Ádilbek Áýbekirov.

Bıyl atqarylatyn jumystyń nátıjesinde SQO aýyldarynyń 83,5 paıyzy jyl sońyna deıin taza sýmen qamtylady.

Bul maqsatqa el qazynasynan 11,4 mlrd astam teńge bólingen.

«Qala mańynda ornalasqan ıAkor aýylynda jazda taza sý jetispeıdi. Kún ystyqta sý tutyný normasy artady. Sondaı-aq qubyrlar eskirgen. Máseleni sheshý úshin jobalyq–smetalyq qujattar daıyndalyp, saraptamaǵa jiberildi. Bul aýylǵa jańadan sý taratý jelisi salynysymen-aq másele sheshiledi. Dál osyndaı másele Jambyl aýdany Presnovka eldi mekeninde de bar. Munda osy jyldyń ekinshi jartysynda sý toraby iske qosylady. Jalpy 2021-2025 jyldarǵa arnalǵan oblystyń keshendi damytý baǵdarlamasy aıasynda barlyq toptyq sý qubyrlaryn jańǵyrtýdy josparlap otyrmyz», - deıdi Ádilbek Áýbákirov.

Bıyl oblys aýdandarynda 22 joba júzege asyrylmaq.

Al SQO-ny 2021-2025 jyldary áleýmettik-ekonomıkalyq keshendi damytý jospary aıasynda taza sýǵa 30 mlrd teńgeden astam qarajat jumsaý josparlanǵan.

Bul 84 myń turǵyny bar 78 eldi mekendi qamtýǵa múmkindik bermek.