SQO-da bıyl 3 myńnan astam otbasyǵa sýdy úıge kirgizýge jaǵdaı jasalmaq

PETROPAVL. QazAqparat – Soltústik Qazaqstan oblysynda eldi mekenderdi taza sýmen qamtý jáne turǵyn úılerge sý jetkizý bıyl da jalǵasady, dep habarlaıdy QazAqparat tilshisi.

SQO ákimi Qumar Aqsaqalovtyń aıtýynsha, óńirde ózekti máselelerdiń biri – eldi mekenderdi taza sýmen qamtý birtindep sheshimin taýyp jatyr. Byltyr osy maqsatqa 6,5 mlrd teńge jumsaldy. 335 shaqyrym jeli jónge keltirilip, 76 aýyl taza sýmen qamtyldy.

Bıyl osy maqsatqa 10,7 mlrd teńge josparlanǵan. Qazir aýyldarǵa sýdy tartyp qana qoımaı, úsh jyldan beri olardy úıge deıin jetkizý boıynsha jumystar atqarylyp jatyr. 2018-2019 jyldary 647 úıge sý kirgizildi. Byltyr 2 900 otbasy baspanaǵa sý tartyp aldy. Bıyl olardyń qatary taǵy 3 myńnan astam shańyraqpen tolyqpaq.

«Sýdy úıge kirgizý – arzan emes. Baspana men qudyqtyń ara qashyqtyǵyna baılanysty baǵa ártúrli. Sol sebepti bıyl sý jelilerin tartý kezinde eldi meken ishinde qudyqtar kóbirek ornalasatyn bolady.

Byltyr ár aýylǵa orta eseppen 12 qudyqtan ornatyldy. Bıyl olardyń sanyn eki ese arttyramyz. 3-6 úıge bir qudyq qoıamyz. Osylaısha turǵyndar azǵantaı shyǵynmen sýdy úılerine kirgize alady», - deıdi Qumar Aqsaqalov.