SQO-da bıyl 18 orman órti tirkelip, 13 mln teńgege shyǵyn keldi

PETROPAVL. QazAqparat – Soltústik Qazaqstan oblysynda órt qaýipti kezeń bastalǵaly mamandar qaýipsizdik talaptaryn saqtamaýdyń 48 deregin anyqtap, 1 mln astam teńgeniń aıyppulyn saldy, dep habarlaıdy QazAqparat tilshisi.

SQO qoǵamdyq keńesinde tıisti vedomstvolar orman órtteri jaıynda, onyń aldyn alýǵa qatysty atqarylyp jatqan jumystary týraly esep berdi.

Osy kúnge deıin SQO aýmaǵynda 18 orman órti shyǵyp, 70 ga jer jandy, sonyń ishinde 65 ga – ormandy alqap.Kelgen shyǵyn 13 mln teńge shamasynda.

Ótken jylmen salystyrǵanda orman órti azaıǵan. SQO orman jáne janýarlar álemi aýmaqtyq ınspektsııasy basshysynyń orynbasary Beıbit Qyzbıkenovtyń aıtýynsha, byltyr 1271,36 ga aýmaqta, sonyń ishinde 609 ga ormanda 26 órt tirkelgen. Shyǵyn 45 mln teńgege jetti.

«Ormannyń órtenýine kináli bir adam anyqtalyp, ákimshilik jaýapkershilikke tartyldy. Ol kelgen shyǵynnyń ornyn toltyryp, 31,7 myń teńge tóledi.

3 ga astam aýmaqty alǵan 5 órt boıynsha ınspektsııa qyzmettik tergeý júrgizdi. Orman zańnamasy buzylýyn joıýǵa qatysty 2 uıǵarym berildi.

Jalpy sáýir aıynan beri mamandar ormandarda órt qaýipsizdigi erejesin buzýdyń 48 deregin anyqtady. Osyǵan baılanysty 1 mln astam teńge ákimshilik aıyppul salyndy», - deıdi Beıbit Qyzbıkenov.

Budan basqa aǵashty zańsyz kesýdiń eki faktisi anyqtalǵan. 15,46 tekshe metr aǵashty keskender 130 myń teńgege jýyq shyǵyn keltirgen. Onyń 97 myńy óndirilip alyndy. Jınalǵan materıal aýdandyq sotqa jiberildi. Al ekinshi is boıynsha aýdandyq sot 345 myń teńge aıyppul saldy.

Beıbit Qyzbıkenovtyń aıtýynsha, byltyr sáıkes kezeńde ormandy zańsyz otaýdyń 15 jaǵdaıy tirkelip, 201 tekshe metr aǵash kesilgen eken.