SQO-da bıyl 1500 otbasy baspanaly bolady

PETROPAVL. QazAqparat - Soltústik Qazaqstan oblysynda turǵyn úı qurylysyna salynǵan ınvestıtsııa kólemi 14 paıyzǵa artty. Statıstıka departamentiniń málimetinshe, jyl basynan osy maqsatqa 13 648,6 mln teńge bólingen. Bul ótken jyldyń on aıymen salystyrǵanda 113 paıyzǵa artyq, dep habarlaıdy QazAqparat tilshisi.

Oblysta turǵyn úı qurylysy qarqyndy júrgizilýde. Bıyl 987 otbasy jańa baspanaǵa kirip, qonys toıyn toılady. Bul ótken jyldyń on aıymen salystyrǵanda 113 paıyzǵa artyq. Turǵyn úıdiń shamamen 60 paıyzy halyq qarajaty esebinen salynyp otyr.

«Nurly jer» turǵyn úı qurylysy baǵdarlamasy aıasynda respýblıkalyq bıýdjet esebinen 457 páter paıdalanýǵa berilgen. Jalpy aýdany - 35109 sharshy metr. Jergilikti bıýdjet esebinen tapsyrylǵan baspanalardyń sany - 32, ıaǵnı 1691 sharshy metr. Al aýyldyq jerlerde jalpy aýdany 46 131 sharshy metr baspana qoldanysqa berildi.

Aıta keteıik, qazir oblys boıynsha turǵyn úıdiń 1 sharshy metriniń ortasha quny 94,5 myń teńgeni qurap otyr.

SQO ákimdiginiń málimetinshe, bıyl jospar boıynsha jalpy aýdany 230 myń sharshy metr bolatyn 1500  turǵyn úı paıdalanýǵa berilýi tıis. Bul - 2017 jylmen salystyrǵanda 115 paıyzǵa artyq. Petropavl qalasynda ekinshi jyl qatarynan tozyǵy jetken úıler súrilip jatyr. Osy aralyqta 600-den astam  eski úı alyndy, olardyń ornyna 2 myń páterlik kópqabatty turǵyn úı salynady.