SQO-da bıyl 1,8 mln malǵa ekpe egildi
Óńirlik kommýnıkatsııalar qyzmetinde SQO aýmaǵynda veterınarııalyq-sanıtarııalyq qaýipsizdikti qamtamasyz etý boıynsha qabyldanǵan sharalar týraly baspasóz máslıhaty ótti. Mamandardyń aıtýynsha, bıyl óńirde malda brýtsellezben aýrýy – 10, qutyrma – 11 deregi, ınfektsııalyq rınotraheıtpen jáne qus tumaýy - 2, qarasannyń (sibir jarasy) bir deregi tirkelgen. Segizi boıynsha jaǵdaı túzelgen joq. Olar brýtsellezge, qarasan men qutyrmaǵa qatysty.
«Óńirde epızootıkalyq qolaıly jaǵdaıdy qalyptastyrý úshin 9 asa qaýipti jáne 3 enzootıkalyq aýrýlarǵa qarsy vaktsınatsııa júrgizildi. 1 mln 824 myń janýarǵa jáne 3 mln 200 myń qusqa ekpe egildi. Sondaı-aq túrli aýrýlarǵa 915 myńnan astam túlik tekserildi. Bul jumystar mal-qus arasynda juqpaly aýrýlardyń taralýyn azaıtýǵa sep boldy. Nátıjesinde brýtsellez juqtyrǵan 561 iri qara mal anyqtaldy, bul ótken jylmen salystyrǵanda 486 basqa az. 3 malda týberkýlez jáne 29-ynda leıkoz tabyldy», - deıdi SQO veterınarııa basqarmasynyń basshysy Berik Áljanov.
Ázirge brýtsellez boıynsha Penkovo jáne Shahovskoe eldi mekenderinde shekteý sharalary alynǵan joq.
«Byltyr qus tumaýynyń saldaryn eskere otyryp, bıyl 3 mln 200 myń qusqa, sonyń ishinde sharýashylyqtardyń 2 mln 100 myń taýyq-úıregine vaktsına saldyq. Qus tumaýy M.Jumabaev aýdanynyń Lebıaje jáne Tımırıazev aýdanynyń Drýjba eldi mekenderinde anyqtaldy», - deıdi Berik Áljanov.