SQO-da birneshe sibir eligin atyp alǵan kúdiktiler ustaldy

PETROPAVL. QazAqparat – Soltústik Qazaqstan oblysynda sibir eligin zańsyz atty degen kúdikpen Petropavldyń eki turǵyny ustaldy. Qylmystyq is qozǵalyp, qarý, oq-dári, janýarlardyń eti tárkilendi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Qyzyljar aýdany Sokolovka poselkelik polıtsııa bólimshesiniń qyzmetkerleri reıd barysynda «Mitsubishi Montero» jol talǵamaıtyn kóligin toqtatqan. Kólikte Petropavldyń 41 jáne 38 jastaǵy eki turǵyny bolǵan. Polıtsııa qyzmetkerleri tekserý barysynda mashınanyń artqy esigine juqqan qandy baıqaǵan. Nátıjesinde salonnan arnaıy qapshyqqa salynǵan 12-kalıbrli «ATA-ARMS» tegis uńǵyly qarý men janýarlardyń eti salynǵan sómke tabyldy. Qujattardy tekserý kezinde er adamdar ań aýlaýǵa shyqqany, olarda bir qoıandy atýǵa ǵana arnalǵan ruqsat qaǵazy bary belgili boldy.

«Shaqyrý boıynsha kelgen jedel-tergeý toby 3 sibir eliginiń zańsyz atylǵan jerin anyqtady. Atalǵan fakti QR Qylmystyq kodeksiniń 337-baby «Zańsyz ańshylyq» boıynsha Sotqa deıingi tergep-tekserýlerdiń biryńǵaı tiziliminde tirkeldi. Qarý, oq-dári, janýarlardyń eti tárkilendi», - deıdi Qyzyljar aýdandyq polıtsııa bóliminiń bastyǵy Álıhan Baıqadamov.

Aıta ketsek, oblysta ótken jyly zańsyz ań aýlaýdyń 19 faktisi tirkeldi.