SQO-da «Birgemiz» qorynan 24 myńǵa jýyq turǵyn 1,2 mlrd teńgeniń kómegin aldy
«Nur Otan» partııasy SQOF baspasóz qyzmetiniń málimetinshe, konferentsııaǵa óńirlik fılıal tóraǵasy, SQO ákimi Qumar Aqsaqalov qatysty.
Qazir SQO-da partııanyń 28,5 myńnan astam múshesi bar, ol 246 bastaýysh partııa uıymyna biriktirilgen.
XXIX esep berý-saılaý konferentsııasynda ótken eki jyldaǵy basty partııalyq oqıǵalarǵa basymdyq berildi.
«Partııa koronavırýstyń alǵashqy tolqyny kezinde halyqty qoldady.
Óńirdiń 23 761 turǵynyna «Birgemiz» qorynan 1 mlrd 188 mln teńgeden astam qarjy aýdaryldy. «Jas Otan» volonterleri belsendilerdiń qoldaýymen 3 myńnan astam otbasyna azyq-túlik sebetterin jetkizdi. Qoǵamdyq qabyldaý bólmelerge 14 myńnan astam ótinish tústi, olardyń 37 %-y oń sheshimin tapty. Ótinishterdiń basym bóligi - 1895-i turǵyn úı- kommýnaldyq salaǵa, 1289-y -áleýmettik qamsyzdandyrǵa jáne turǵyn úı jáne jer ýchaskelerin bólýge, jumysqa ornalastyrý jáne eńbek daýlary boıynsha boldy.
«Baqytty otbasy», «Ardagerlerdi ardaqtaıyq», «Kedergisiz keleshek» partııalyq jobalary aıasynda 1 900-den astam is-shara ótkizildi», - deıdi «Nur Otan» partııasy SQOF tóraǵasynyń birinshi orynbasary Ásem Rahmetova.
Partııa fılıaly kadrlyq rezervti qalyptastyrý, jastardy qoldaý boıynsha jumys júrgizdi. Partııalyq baqylaý komıssııasy men Sybaılas jemqorlyqqa qarsy is-qımyl jónindegi qoǵamdyq keńestiń qyzmeti jandandyryldy.
Mysaly, 2019 jáne 2020 jyldary Partııalyq baqylaý komıssııalary partııa Jarǵysyn saqtamaǵany úshin 29 partııa múshesin jaýapqa tartty, 7 adam eskertý jáne 5 adam sógis aldy, 2 adam Jarǵyny saqtamaǵany úshin, 15 adam sybaılas jemqorlyq úshin partııadan shyǵaryldy.
Sybaılas jemqorlyqqa qarsy is-qımyl jónindegi Qoǵamdyq keńester jumysynyń qorytyndysy boıynsha sybaılas jemqorlyq quqyq buzýshylyqtary úshin partııadan 18 adam shyǵaryldy, partııanyń 29 múshesi partııalyq jaýapkershilikke tartyldy.
Partııanyń aımaqtyq fılıalynyń tóraǵasy Qumar Aqsaqalovtyń aıtýynsha, «Ózgerister joly: ár azamatqa laıyqty ómir!» saılaý aldyndaǵy baǵdarlamalardyń oryndalýyn baqylaý - jumystaǵy negizgi basymdyq bolyp qalmaq.
«12 qoǵamdyq keńes bar. Óńirde bes jyl ishinde serpindi ınvestıtsııalyq jobalardy iske asyrý kózdelgen. Ol úshin respýblıkalyq bıýdjetten 500 mlrd teńgeden astam qarajat baǵyttalady. Buǵan deıin óńir eshqashan mundaı aqshany alǵan emes. Tıisinshe, bul qarajatqa qatań baqylaý qajet. Saılaýaldy baǵdarlama aıasynda jasalyp jatqan isterdiń barlyǵy halyqtyń ıgiligine baǵyttalǵan», - deıdi SQO ákimi Qumar Aqsaqalov.
Konferentsııa delegattary «Nur Otan» partııasy SQOF Saıası keńesi men baqylaý-tekserý komıssııasynyń jańa quramyn saılady.