SQO-da birer saǵattyń ishinde 34 adam taıǵanap qulap, dárigerge júgingen

PETROPAVL. QazAqparat – Soltústik Qazaqstan oblysynda kóktaıǵaqtyń saldarynan jaraqat alyp, aıaq-qolyn syndyrǵandar sany kúrt artty, dep habarlaıdy QazAqparat tilshisi.

Búgin tańǵa jýyq SQO aýmaǵynda jańbyr jaýyp, arty kóktaıǵaqqa ulasty.

Arnaıy tehnıka saǵat tańǵy 5.00-den kóshege shyǵyp, qum-tuz qospasyn sepkenimen, jaraqattanǵandar sany azaıar emes.

Petropavl qalalyq kópsalaly jedel medıtsınalyq járdem aýrýhanasy baspasóz qyzmetiniń málimetinshe, tańnan bastap saǵat 11.00-ge deıin emdeý mekemesiniń jaraqat bólimine 34 adam júgingen.

Onyń ekeýine ota jasalmaq.

«Negizinen aıaq-qoldaryn syndyryp túsip jatyr. Bes naýqasty aýrýhanaǵa jatqyzýǵa týra keldi. Jalpy kóktaıǵaqtyń saldarynan keshe 32 adam jaraqatpen dárigerlerge qaraldy. Jaraqat bóliminde olarǵa barlyq tıisti em-dom berilip jatyr», deıdi aýrýhananyń baspasóz hatshysy Ekaterına Beloýsova.

Al oblystyq polıtsııa departamenti baspasóz qyzmetiniń málimetinshe, túngi saǵat 00.00-den bastap, saǵat 11.00-ge deıin Petropavlda 5 jol-kólik oqıǵasy tirkeldi.

Zardap shekkender joq, tek kólikterge mehanıkalyq zaqym keldi.

Sondaı-aq, buǵan deıin mektepterde birinshi aýysymnyń oqýshylary ǵana qashyqtan oqýǵa kóshirilse, endi qalǵan balalar da onlaın oqıtyn bolyp jatyr.