SQO-da bir jylda azyq-túlik orta eseppen 25 paıyzǵa qymbattaǵan

PETROPAVL. QazAqparat – Ulttyq statıstıka bıýrosynyń Soltústik Qazaqstan oblysy boıynsha departamenti ótken jyldy qorytyndylap, ınflıatsııanyń 20,6 %-ǵa óskenin málim etti, dep habarlaıdy QazAqparat tilshisi.

Departamenttiń málimetinshe, azyq-túlik baǵasy bir jylda orta eseppen - 25,7%, azyq-túlik emes taýarlar - 19%, aqyly qyzmetterdiń baǵasy 14 %-ǵa qymbattaǵan.

Azyq-túlik bir jylda orta eseppen 25,7 % ósse, sonyń ishinde eń kóp qymbattaǵany - qant, onyń baǵasy 55%, un 44%-ǵa artqan. Al jarmalar ótken jyly - 42%, nan-toqash jáne kondıterlik ónimder - 41%, makaron ónimderi - 33%, sút ónimderi - 30% jýyq, alkogoli joq sýsysndar - 23%, et 21% qymbattaǵan. Jemis-jıdektiń de baǵasy ósip, 25%, kókónister 16,9% artqan.

Jýyp-tazalaıtyn ónimderdiń de baǵasy aspandap, bir jylda - 36,7%, turmystyq qurylǵylar - 23,5%, turǵyn úılerdi jóndeýge arnalǵan materıaldar - 19%, kıim men aıaq kıim - 16,8%, dári-dármek 14,2% qymbattady.

Bir jyldyń ishinde jalǵa beriletin páterdiń baǵasy shamamen 47% ósken. Qoǵamdyq tamaqtaný oryndary óz qyzmetteriniń qunyn shamamen 30% arttyrsa, shashtarazdar men jeke qyzmet kórsetý oryndary baǵany 26% ósirgen.

Aıta keteıik, ınflıatsııa deńgeıin sıpattaıtyn tutyný baǵalarynyń ındeksi halyqtyń jeke tutyný úshin satyp alatyn taýarlary men qyzmetter baǵasynyń ózgerýin kórsetedi. Taýarlar men qyzmetter jıyntyǵy 508 pozıtsııany qamtıdy. Baǵalar ártúrli menshik nysandaryndaǵy saýda jáne qyzmet kórsetý kásiporyndarynan irikteý arqyly alynady.