SQO-da bir túnde kóshede qańǵyryp júrgen 26 jasóspirim anyqtaldy
SQO polıtsııa departamenti baspasóz qyzmetiniń málimetinshe, tártip saqshylary túngi kóshelerde jáne kóńil kóterý oryndaryna reıdter júrgizip jatyr. Saǵat 22.00-den keıin kámelet jasyna tolmaǵandar zańdy ókilderinsiz úıden tys júrýine tyıym salynǵan.
Petropavldaǵy dámhanalardyń birine 17 jasar qyz tanystarymen qydyryp kelgen. Jasóspirimniń anasy da, dámhananyń ıesi de ákimshilik jaýapkershilikke tartyldy.
Sondaı-aq, polıtseıler turmysy qolaısyz otbasylardy da nazarǵa alǵan. Petropavlda osyndaı bir otbasyn tekserý kezinde kámeletke tolmaǵan qyzynyń túnde úıinde bolmaǵany belgili boldy. Esepte turǵan bul otbasynda qyz bala oqýyna nemquraıly qaraıdy, anasy spırttik ishimdikke táýeldi. Qazirgi ýaqytta bul másele kámeletke tolmaǵandardyń isteri jónindegi komıssııa qaraýyna shyǵarylmaq.
«Bul jumys maýsymnyń 27-29-y aralyǵynda ótken «Túngi qaladaǵy balalar» jedel-profılaktıkalyq is-sharasy aıasynda júrgizildi. Іs-sharanyń maqsaty – kámelet jasyna tolmaǵandardyń eresekterdiń qaraýynsyz júrýine jol bermeý, jasóspirimderdiń jáne olarǵa qatysty jasalatyn qylmystardyń aldyn alý. Reıdter prokýratýra, densaýlyq saqtaý, bilim basqarmalarynyń ókilderi, sondaı-aq ata-analarmen birlese júrgizilip jatyr», - deıdi SQO polıtsııa departamenti jergilikti polıtsııa qyzmeti basqarmasy bastyǵynyń orynbasary Aleksandr Rozbah.
Polıtseıler jasóspirimder júrýi múmkin oryndardy, onyń ishinde saıabaqtar, qaraýsyz qalǵan úılerdi tekserip jatyr. Tek bir túnniń ishinde kóshe kezgen 26 jasóspirim anyqtaldy. Jalpy oblys boıynsha 38 túrli quqyqbuzýshylyq belgili boldy. Kámeletke tolmaǵandardy tárbıeleý boıynsha mindetterin atqarmaǵany úshin 8 ata-ana jaýapqa tartyldy.