SQO-da bir eldi mekende aýyz sý ártúrli tarıfpen satylady

PETROPAVL. QazAqparat – Soltústik Qazaqstan oblysy ákimdiginde vedomstvoaralyq komıssııanyń otyrysy ótti. Otyrys barysynda birneshe ózekti másele, sonyń ishinde eldi mekenderdi aýyz sýmen qamtamasyz etý barysy qaraldy, dep habarlaıdy QazAqparat tilshisi.

SQO sybaılas jemqorlyqqa qarsy qyzmettiń málimetinshe, óńir basshysy Aıdarbek Saparovtyń basshylyǵymen oblystyq ákimdikte sybaılas jemqorlyqqa qarsy is qımyl máseleleri jónindegi vedomstvoaralyq komıssııanyń otyrysy ótti.

QR Sybaılas jemqorlyqqa qarsy is-qımyl agenttiginiń SQO boıynsha departamentiniń basshysy Sergeı Perovtyń aqparaty boıynsha, 2022 jyly tabıǵı monopolııalar sýbektilerine jergilikti bıýdjetten 3,5 mlrd teńge sýbsıdııa, onyń ishinde «Esil Sý» fılıalyna 3,2 mlrd teńge qarjy bólingen.

Aýyldardaǵy tutynýshylar úshin toptyq sý qubyrlarynan aýyz sýdy ótkizýmen 22 tabıǵı monopolııa sýbektisi jáne 180-nen astam dıler aınalysady.

«Óńirdiń eldi mekenderinde aýyz sý tarıfi ártúrli, 1 tekshe metr úshin 40-500 teńge aralyǵynda. Mysaly, Ǵabıt Músirepov atyndaǵy aýdannyń «Býdennoe-SK» JShS-de aýyz sýdy 1 tekshe metr úshin 40 teńge tarıfimen satady. Al Mamlıýt aýdanyndaǵy jeke tulǵa L.V. Andreeva 1 tekshe metr sýdy 500 teńgeden saýdalap jatyr», - dedi Sergeı Perov.

Bir eldi mekenniń ózinde aýyz sýdy ártúrli baǵamen satý faktileri bar.

Máselen, Tımırıazevo aýylynda 2 sý berýshi bar. «Alpash» JShS tekshe metr sýdy 125 teńgeden satsa, «Tımırıazev elevatory» JShS-de sý 200 teńge turady.

Departament jıyn barysynda sýmen jabdyqtaý salasyndaǵy múddeli organdardyń ózara is-qımyl algorıtmderin usyndy. Onyń ishinde tabıǵı monopolııalar sýbektilerin «tikeleı» sýbsıdııalaý, sondaı-aq aýyz sýdy satýmen aınalysatyn aýyl sharýashylyǵy óndirýshileriniń jáne tikeleı tutynýshylardyń áleýmettik jaýapkershiligin arttyrý.