SQO-da bir aýdanda bir kúnniń ishinde bes órt tirkeldi

PETROPAVL. QazAqparat – Soltústik Qazaqstan oblysy Qyzyljar aýdanynda bir kúnde bes órt tirkeldi, dep habarlaıdy QazAqparat tilshisi.

Qyzyljar aýdany boıynsha tótenshe jaǵdaılar bóliminiń bastyǵy Aslan Ahmetjanovtyń aıtýynsha, aýdan ortalyǵy Beskóldegi 101 pýltine tańerteń Peterfeld eldi mekeninde órt shyqqandyǵy týraly habarlama túsken.

«Órtti sóndirip bolyp jatqanda, shamamen bir saǵattan keıin Beskólde azyq-túlik dúkeni janyp jatyr degen shaqyrtý tústi. Keıin araǵa saǵat salyp taǵy birneshe órtti sóndirýge attandyq.

Znamenskoe eldi mekeninde iri órt boldy. Eki qora, úsh garaj, 2020 jylǵy «Toyota RAV4» avtokóligi, eki monsha janyp ketti. 30 toraı men 500 taýyq óldi. Jalyn sharpyǵan aýmaqtyń jalpy aýdany 180 sharshy metr. Órtti 2 páterli turǵyn úıge jetkizbeı sóndirip aldyq. Aldyn ala boljam boıynsha, órttiń shyǵýyna sóndirilmegen sireńke nemese temeki tuqyly sebep bolýy múmkin», - deıdi Aslan Ahmetjanov.

Al Sokolovka eldi mekeninde monsha janǵan.

«Sokolovka eldi mekeninde turǵyn úıdegi monshada órt shyǵyp, jalyn 2-páterli úıdiń shatyryna aýysqan. Saldarynan shatyr tolyǵymen janyp ketti. Sondaı-aq, dálizdiń qabyrǵasy da zaqymdanǵan. Qazirgi tańda shyǵyn mólsheri anyqtalyp jatyr. Jalpy jyl basynan aýdanda órtten 5 adam qaza tapty», - deıdi bólim basshysy.

Mamandardyń aıtýynsha, SQO-da jyl basynan 458 órt tirkeldi, 36 adam qaza tapsa, 35 adam kúıik aldy. Materıaldyq shyǵyn 175 mln teńge shamasynda.