SQO-da bir apta ishinde mas júrgen 414 adam jaýapqa tartyldy

PETROPAVL. QazAqparat – Soltústik Qazaqstan oblysynda 6-12 aqpan aralyǵynda qoǵamdyq oryndarda mas júrgen 414 adam jaýapqa tartyldy. Osy kezeńde óńirde «Qaýipsiz apta» aýqymdy jedel-profılaktıkalyq is-sharasy ótti, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, bir apta ishinde qorǵaý nusqamasyn buzýdyń 13 faktisi jáne quqyq buzýshylardyń minez-qulqyna qoıylatyn erekshe talaptardyń buzylýynyń 33 deregi anyqtaldy.

«Quqyq buzýshylyqtardyń jasalýyna sebep bolatyn jaǵdaılar turǵylyqty mekenjaıǵa barǵan kezde aıqyn kórinedi. Máselen, kúndiz áıeli jumysta bolǵan kezde esepte turǵan eńbekke qabiletti kúıeýi ishimdikke toıyp, úıde jatqan. Bizge mundaı jaǵdaı tańsyq emes. Ásirese, turmystyq zorlyq-zombylyq tirkelgen úılerde bul ádettegi jaǵdaı», - deıdi tártip saqshylary.

Polıtseıler apta ishinde esepte turǵan 4 myńnan astam mekenjaıdy tekserdi. Olardyń jartysy – maskúnem. Sondaı-aq turmysy qolaısyz 304 otbasy, shartty túrde merziminen buryn bosatylǵan 495 adam, turmysta quqyq buzýshylyq jasaǵan 554 adam tekserildi.

«Alkogoldi asyra paıdalanatyn adamdar bolatyn oryndar, jalǵa beriletin turǵyn úıler tekserildi. Alkogoldi ruqsatsyz satqany úshin 20 adam jaýapkershilikke tartyldy. Zańsyz aınalymnan quramynda spırt bar 400 lıtrden astam ónim tárkilendi», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.

Budan bólek, ótken aptada patrýldik polıtsııa batalonynyń qyzmetkerleri kúsheıtilgen rejımde jol júrisi qaǵıdalarynyń óreskel buzýshylyqtaryn anyqtaý úshin tekserýler júrgizdi. Olar 13 mas júrgizýshini toqtatty. Іs-shara barysynda 1495 túrli quqyq buzýshylyq anyqtaldy.