SQO-da byltyr 1620 km respýblıkalyq joldyń sapasy tekserilip, olqylyqtar joıyldy
«Jol aktıvteri sapasynyń ulttyq ortalyǵy» RMK SQO fılıalynyń málimetinshe, irikteý arqyly respýblıkalyq, oblystyq, jergilikti mańyzdaǵy joldar jáne kóshe joldary tańdap alyndy. Mamandardyń tekserisi kezinde 280 olqylyq anyqtalǵan. Negizinen sýǵa qanyǵý, tyǵyzdyq koeffıtsıentinde, qysý beriktiginiń sheginde, ınertti materıaldardyń quramynda sáıkessizdikter bolǵan.
Budan bólek 2,5 myńǵa jýyq jol-qurylys materıaldarynyń úlgisi alynyp, onyń 683-i, ıaǵnı 27% normatıvti-tehnıkalyq qujattama talaptaryna saı bolmaı shyqqan.
Máselen respýblıkalyq joldar boıynsha 32 nysan tekserildi. Jalpy uzyndyǵy – 1620 km. Sonyń 300 km kepildikte turǵan. Mamandar baqylaýǵa alynǵan nysandarǵa eki júzden asa baryp, 739 ret synama alǵan. Sonyń 18% talapqa saı bolmaǵan.
Budan bólek 661 km joldyń tegistigi syn kótermeıdi, 93 km ilinisý koeffıtsıenti qanaǵattanarlyqsyz, 6 km serpimdilik modýli sáıkes kelmese, 297 km jolda oılar bolǵan.
Al jalpy byltyr baqylaýǵa alynǵan nysandardyń jartysy eldi mekenderdiń kóshe joldarynyń jóndeýine qatysty boldy. 101 nysannan 500-den asa synama alynyp, sonyń jartysy boıynsha sáıkessizdik anyqtalǵan. Barlyq anyqtalǵan olqylyqtar boıynsha fılıal tıisti hat joldap, nátıjesinde sáıkessizdikter joıyldy.
Esterińizge salaıyq, bıyl SQO-da bıyl jergilikti mańyzy bar 600 km jol jóndelmek.