SQO-da bilim bóliminiń basshysy jemqorlyq jónindegi eki bappen kúdikke ilikti

PETROPAVL. QazAqparat – Soltústik Qazaqstan oblysynda aýdandyq bilim bóliminiń basshysy sybaılas jemqorlyq qylmys jasady degen kúdikpen ustaldy. Qazir ol qamaýda otyr, dep habarlaıdy QazAqparat tilshisi.

Soltústik Qazaqstan oblysy boıynsha Sybaılas jemqorlyqqa qarsy is-qımyl departamentiniń málimetinshe, Maǵjan Jumabaev aýdany bilim bóliminiń basshysy Sara Ramazanovaǵa qatysty sybaılas jemqorlyq qylmys jasaý faktisi boıynsha sotqa deıingi tergeý júrgizilip jatyr. Memlekettik qyzmetkerge QR Qylmystyq Kodeksiniń 366 jáne 367-baptary boıynsha is qozǵalǵan.

«Petropavl qalasynyń mamandandyrylǵan tergeý sotynyń sanktsııasymen S.M. Ramazanova qamaýǵa alyndy. Ózge aqparat QR QPK-niń 201-babyna sáıkes jarııa etýge jatpaıdy», - delingen baspasóz habarlamasynda.

Esterińizge salaıyq, buǵan deıin memlekettik balabaqshalardy jekemenshik áriptestik aıasynda senimgerlik basqarýǵa berý barysynda S.M. Ramazanovanyń basy daýǵa qalǵan edi. Kópshilik «senimgerlik basqarýǵa berilgen 3 mektepke deıingi bilim berý mekemesinde qazaq toptary jabylady, tólemaqy ósti jáne balabaqshalar jekemenshikke ótip, óz týystaryna berildi» dep narazylyqtaryn bildirdi.

Petropavldaǵy balabaqsha daýyna baılanysty 6 laýazymdy tulǵa jaýapkershilikke tartyldy.