SQO-da bilim bólimderi balabaqshalardy negizsiz teksermek bolǵan

PETROPAVL. QazAqparat – Soltústik Qazaqstan oblysynda bilim bólimderi jekemenshik mektepke deıingi bilim beretin uıymdardy zańsyz teksermek bolǵan. Sybaılas jemqorlyqqa qarsy qyzmet muny tekseris barysynda anyqtady, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń málimetinshe, jalpy respýblıkalyq tájirıbeni taldaý aıasynda shaǵyn jáne orta bıznes ókilderin negizsiz tekserý faktisiniń aldyn aldy.

Oblys aýdandarynyń jáne Petropavl qalasynyń bilim bólimderi jeke balabaqshalarmen jasaǵan sharttarǵa olardy tekserý is-sharalarymen qamtý quqyǵyn beretin tarmaqty engizgen.

Máselen, SQO-da 18 jekemenshik mektepke deıingi uıym jumys isteıdi, kásipkerlermen bilim bólimderi memlekettik bilim berý tapsyrysy aıasynda qyzmet kórsetý sharttaryn jasasqan.

«Osylaısha, tapsyrys berýshiler QR Kásipkerlik Kodeksi normalarynyń talaptaryna, sondaı-aq 2024 jyldyń 1 qańtaryna deıin shaǵyn-orta bıznes nysandaryn tekserýge moratorıı jarııalanǵanyna qaramastan baqylaý jáne qadaǵalaý organdarynyń fýnktsııalaryn ózderine júktegen» dep túsindirdi vedomstvo.

Sybaılas jemqorlyqqa qarsy is-qımyl agenttiginiń SQO boıynsha departamenti basshylyǵy men oblystyń bilim basqarmasy basshylyǵy kezdesip, nátıjesinde zańdy buzatyn tarmaqty sharttardan alyp tastaý týraly sheshim qabyldady.