SQO-da bıyl júzden astam turǵynǵa psorıaz dıagnozy qoıyldy

<p>PETROPAVL. KAZINFORM &mdash; Soltústik Qazaqstan oblysynda bıyl 123 naýqasqa psorıaz dıagnozy qoıyldy, onyń 38-i aýyl turǵyny.</p>

«Áleýmettik medıtsınalyq saqtandyrý qory» KEAQ SQOF baspasóz qyzmetiniń málimetinshe, bul aýrýmen aýyrǵandar qatary sońǵy jyldary kóbeıgen. Máselen, ótken jyldyń 11 aıy ishinde osy dert 106 adamda anyqtaldy.

— 2018 jyldan bastap Qazaqstanda psorıazdy emdeý tegin ambýlatorlyq dári-dármekpen qamtamasyz etý tizbesine engizildi. Nátıjesinde em-dom MÁMS júıesi aıasynda qarjylandyryla bastady. Naýqastardyń gendik-ınjenerlik bıologııalyq terapııany tegin alýǵa múmkindikteri bar, — deıdi «Áleýmettik medıtsınalyq saqtandyrý qory» KEAQ SQOF dırektorynyń orynbasary Talǵatbek Tleýberdın.

Psorıazben aýyrǵan naýqastar, sonyń ishinde «saqtandyrylǵan» azamattar tegin ambýlatorııalyq em qabyldap, qymbat «Stelara» dárilik preparatyn ala alady. Onyń quny 1 mln 45 myń teńgeden bastap, 1 mln 213 myń teńgege deıin jetedi.

— Búgingi kúni Petropavlda turatyn 80 naýqasqa jalpy somasy 183,8 mln teńgege 136 retsept jazyldy, aýyldaǵy 33 naýqasqa 81,6 mln teńgeniń 45 retsepti berildi. Psorıaz — sozylmaly juqpaıtyn dert, kóbine teri zaqymdanady. Aýrý teri qurǵap, qabyrshaqtanǵan daqtar paıda bolady. Bul aýrý býyndardy da zaqymdap, saldarynan adam múgedek bolyp qalýy múmkin. Teride paıda bolǵan qabyrshaqty daqtar naýqastyń fızıkalyq jáne emotsıonaldy jaǵdaıyna áser etedi, aýyrǵan adam tómenshiktep, jaısyzdyq sezinedi, — deıdi Talǵatbek Tileýberdın.

Qazaqstanda, óńirlik dermatovenerologııalyq qyzmetterdiń málimetinshe, búgingi tańda 7 myńǵa jýyq adamǵa psorıaz dıagnozy qoıylǵan. Olardyń 30% aýrýdyń ortasha formalary tirkeldi.

Buǵan deıin SQO-da shoshqa tumaýyn juqtyrǵandardyń anyqtalǵanyn jazǵan edik.