SQO-da bıyl týberkýlezben aýyrǵandarǵa 38 mln teńge somasynda járdemaqy berildi

<p>PETROPAVL. KAZINFORM — Soltústik Qazaqstan oblysynda týberkýlezben aýyrǵandar sany azaıyp keledi. Byltyr jańadan 123 adam aýyrsa, bıyl osy aralyqta 112 adamǵa dıagnoz qoıyldy.</p>

Petropavlda «Qazaqstanda týberkýlezdi toqtataıyq» degen ataýmen advokatsııalyq keńes ótti.

Dúnıejúzilik densaýlyq saqtaý uıymynyń dereginshe, Qazaqstan «túrli dárige boı bermeıtin týberkýlez» dertine shaldyqqandar sany boıynsha alǵashqy 30 eldiń qatarynda tur. 

Máselen bıyl SQO-da jańadan 123 adamda týberkýlez derti anyqtalǵan. Aýyrǵandardyń jeteýi — 17 jasqa deıingi bala. Desek te bul — ótken jyldyń deregimen salystyrǵanda tómen. 

«Týberkýlezdiń aldyn alý úshin tıisti sharalar qolǵa alynǵan. Ftızıopýlmonologııa ortalyǵynda jáne oblystyń tórt aýdanynda G-xpert apparaty bar. Bul aýrýdy tez, ári sapaly anyqtaýǵa múmkindik beredi. Týberkýlezdi emdeý úshin jańa preparattar qoldanylady. Syrqattar ózderin qolaıly seziný úshin basymdyq ambýlatorlyq jáne beınebaqylanatyn emge beriledi. Eń bastysy — úkimettik emes uıymdarmen birlesken jumys, olar áleýmettik jaǵdaıy tómen ortadan shyqqan syrqattarǵa materıaldyq, áleýmettik, psıhologııalyq qoldaý kórsetip, tezirek emdelip ketýine kómektesedi», — deıdi SQO ftızıopýlmonologııalyq ortalyq dırektory Qumar Kúsemisov. 

Bıyl SQO-da 85 myńnan astam adam flıýorografııalyq tekseristen ótken, bul — jospardyń shamamen 70 paıyzy. Nátıjesinde jańadan 94 syrqat anyqtaldy. 

Jalpy qazirgi ýaqytta óńirde 246 adam dıspanserlik esepke alynǵan, onyń 56-sy statsıonarlyq em alyp jatyr. 

Petropavlda jáne oblystyń segiz aýdanynda «Senim Soltústik» úkimettik emes uıym jumys isteıdi.

Olar emdelýden jaltaryp júrgen syrqattardy anyqtaýǵa, qujaty joqtarǵa jeke kýálik alýǵa kómektesedi. 

Budan bólek aýyrǵandar men olardyń týystaryna psıhologııalyq qoldaý kórsetip, materıaldyq týrasynda, sonyń ishinde aıyppuldaryn óteýge kómektesedi.

Bıyl uıym halyqtyń áleýmettik jaǵynan osal tobyna jatatyndar arasynan 12 syrqatty anyqtap, em alýdan qashyp júrgen 17 adamdy emdeý mekemesine qaıtardy. 

«2023 jyldan bastap oblystyń barlyq aýdandarynda týberkýlezben aýyratyndarǵa járdemaqy berilip keledi. Byltyr 7 aıda 328 syrqatqa 27 mln teńge berilse, bıyl jeti aıda 310 adam 38 mln teńgeden astam kómek aldy», — deıdi Qumar Kúsemisov. 

Buǵan deıin SQO-da COVID juqtyrǵan 4 adamnyń em alyp jatqanyn jazǵan edik.