SQO-da bıyl sońǵy on jyldaǵy esirtkiniń eń úlken partııasy tárkilendi
SQO Polıtsııa departamenti bastyǵynyń jedel jumys jónindegi orynbasary Asqar Muhametqalıevtiń aıtýynsha, óńirde jyl basynan beri esirtki qylmysyna qatysty 272 derek tirkeldi. Bul ótken jylmen salystyrǵanda 30 faktige kóp. Onyń 115-i - esirtkini ótkizý jáne 9-y - asa iri mólsherde saqtaýdyń deregi. Zańsyz aınalymnan 739 kg 486 gr túrli preparattar tárkilendi, onyń 694 kg - marıhýana, 23 kg 865 gr - gashısh jáne 2 kg 572 gr - sıntetıkalyq preparattar.
«Bıyl sońǵy 10 jyldaǵy esirtkiniń eń úlken partııasy tárkilendi, salmaǵy shamamen 600 kg. Onyń 20 kg gashısh bolsa, qalǵany marıhýana. Qańtar aıynan bastap oblysta 3 fıtolaboratorııa jáne sıntetıkalyq esirtki óndiretin 1 narkolaboratorııa anyqtaldy», - deıdi Asqar Muhametqalıev.
Halyqpen ózara is-qımyldy arttyrýdy maqsat etken SQO polıtseıleri «Qazaqstannyń bolashaǵy úshin» qoǵamdyq stýdenttik birlestigimen birlesip, Telegram-da t.me/sko_narkohelp_bot anonımdi chat-botty iske qosty.
«Qazan aıynan bastap oǵan «esirtki dúkenderiniń» jarnamasy boıynsha 36 habarlama jáne esirtki jasyrýshy týraly bir aqparat tústi, sońǵy fakti boıynsha kúdikti birden ustaldy. Nashaqorlyqtyń aldyn alýǵa erekshe kóńil bólinetinin atap ótken jón. Qańtar aıynan bastap polıtsııa qyzmetkerleri 785 profılaktıkalyq is-shara ótkizdi, osylaısha 50 myńnan astam jasty qamtydy. Halyqty aqparattandyrý mańyzdy mindetterdiń biri, óıtkeni nashaqorlyq pen esirtki bıznesin polıtsııa men qoǵamnyń birlesken kúsh-jigerimen ǵana jeńýge bolady», - deıdi Asqar Muhametqalıev.