SQO-da bıyl eńbek zańnamasyn buzǵandarǵa 13 mln teńge aıyppul salyndy

<p>PETROPAVL. KAZINFORM &ndash; Soltústik Qazaqstan oblysy Aqqaıyń aýdany Vlasovka eldi mekenindegi sharýashylyqtardyń birinen eńbekaqylaryn ala almaı júrgen eki mehanızator Kazinform tilshisine habarlasyp, kómek surady. &nbsp;</p>

Rodıon Kýbrın «Grain Rich» JShS-de mehanızator bolyp 1,5 jyl jumys istegen. Shilde aıynyń ortasynda jumystan ketken. Sodan beri, aıtýynsha, eńbekaqysyn tolyq ala almaı júr.

«Bul sharýashylyqta únemi eńbekaqyny keshiktiredi. Sol sebepti basqa jumys izdeýime týra keldi. 18 shilde sońǵy jumys kúnim boldy. Ótinishime qol qoıdy, eńbek kitapshamdy qolyma ustatty. Al, eńbekaqym joq.

Zeınetaqy qoryna jasalǵan aýdarym boıynsha baıqasam, maýsymda 465 myń teńge taýyppyn, shildedegi eńbekaqymdy bilmeımin, surasam jaýap bermeıdi.

Áıelim saýynshy bolyp istegen, oǵan da eńbekaqysyn bergen joq», - deıdi Rodıon Kýbrın.

Al, Vıktor Voloşýktyń aıtýynsha, ol bul sharýashylyqta 2,5 jyl mehanızator bolyp eńbek etken.

«Baspana berip, sol úshin osy aralyqta 1,6 mln teńge tóledim. Endi basqa sharýashylyqqa ketip jatyrmyn. Úıge tólegen aqshamdy qaıtarmaı otyr, eńbekaqymdy da ala almaı júrmin», - deıdi Vıktor Voloşýk.

«Grain Rich» JShS dırektory Vladımır Gerdt osy máselege qatysty túsinik berdi. Materıal ázirlenip jatqanda jumysshylarǵa maýsym aıynyń eńbekaqysy tolyq tústi.

«Iıa, bul eki mehanızator jumystan ketti. Aldyn ala eskertpesten biz ketemiz dedi, ol durys emes qoı. Zań boıynsha bir aı nemese eki apta jumys istep, sosyn ketsin. Olar egin oraǵy aldynda tehnıkany tastap, ketip otyrdy. Adam sııaqty kelip sóılesse, túsindirse. Eńbekaqyny qashan beresiń dep sms habarlama jazyp jiberipti.

Bizde áleýmettik paket qarastyrylǵan. 12 aı istese, eńbek demalysy tólenedi. Baspanamen qamtımyz.

Voloşýk kelgende de baspana berdik, kelisim boıynsha ol keminde 5 jyl bizdiń sharýashylyqta jumys isteýi kerek edi.

Osy aptada eńbekaqy boıynsha bereshekten qutylamyz», - dedi Vladımır Gerdt.

SQO memlekettik eńbek ınspektsııasy basqarmasynyń málimetinshe, 2024 jyldyń 7 aıynda ınspektsııa óńirdiń kásiporyndary men uıymdaryna 213 tekseris júrgizip, eńbek zańnamasyn buzýdyń 150 deregin anyqtady. 

«Jumys berýshilerge anyqtalǵan zań buzýshylyqtardy joıýǵa 96 uıǵarym berildi. 71 laýazymdy jáne zańdy tulǵa ákimshilik jaýapkershilikke tartylyp, olarǵa jalpy somasy 13,1 mln teńgeniń aıyppuly salyndy. 

Jyl basynan beri memlekettik eńbek ınspektorlary 251 jumysshyǵa 63,2 mln teńge eńbekaqy boıynsha bereshektiń barlyǵyn anyqtady. 33 kásiporynǵa 2 myń AEK mólsherinde aıyppul salyndy», - delingen vedomstvonyń tilshige bergen jaýabynda.

Buǵan deıin SQO-da bilim berý salasynyń úsh laýazymdy tulǵasy jaýapkershilikke tartylǵanyn jazǵan edik.