SQO-da bıyl avtomobıl kóligi salasynda 50 mln teńgege jýyq aıyppul salyndy

<p>PETROPAVL. KAZINFORM &ndash; Soltústik Qazaqstan oblysy boıynsha kóliktik baqylaý ınspektsııasy jyl basynan beri 2 myńnan astam kólikti tekserip, 475 ákimshilik is qozǵady.</p>

Vedomstvonyń mindeti – qozǵalys qaýipsizdigin arttyrý jáne avtomobıl joldary jelisiniń saqtalýyn qamtamasyz etý maqsatynda baqylaýdy júzege asyrady. Bul jumysty 3 jyljymaly beket arqyly ınspektsııanyń avtomobıl kóligindegi baqylaý bóliminiń 11 mamany júzege asyrady.

«Jyl basynan beri barlyǵy 2095 avtokólik quraly tekserildi, onyń 1546 sheteldik, qalǵany otandyq júk kólikteri. Zań buzýshylyq faktileri boıynsha ınspektsııa qyzmetkerleri avtomobıl kóligi salasynda 475 ákimshilik is qozǵady. 49,64 mln teńge somasyna aıyppul salyndy. Respýblıkalyq bıýdjetke avtokólik quraldary ıelerinen jol júrgeni úshin 2,35 mln teńge mólsherinde alym tústi», - deıdi SQO boıynsha Kóliktik baqylaý ınspektsııasynyń basshysy Abylaı Qazbaev.

SQO Polıtsııa departamenti ákimshilik polıtsııa basqarmasynyń derekteri boıynsha oblys aýmaǵynda tirkelgen júk kólikteriniń jalpy sany – 7494, onyń ishinde ruqsat etilgen eń joǵary salmaq – 20 tonnalyq jáne odan asatyn samosvaldar sany – 1435.

«Taldaý barysynda elimizde ruqsat etilgen salmaq parametrlerinen asatyn júk kólikteriniń basym bóligi avtomobıl joldaryn salý jáne qalpyna keltirýge qoldanylatynyn anyqtadyq. Negizinen Qytaıda jasalǵan samosvaldar joldardyń keıbir ýchaskelerin jóndeý úshin ınertti materıaldardy tasymaldasa, sondaı-aq joldardyń basqa ýchaskelerin zaqymdap jatyr. Sondyqtan mundaı faktilerge jol bermeý úshin tapsyrys berýshiler merdigerlermen shart jasasqan kezde muny eskerip, aýyr salmaqty samosvaldardy tartýǵa jol bermeýdi usynamyz», - deıdi Abylaı Qazbaev.

Qazirgi ýaqytta SQO aýmaǵynda qıyrshyq tas, qum, saz jáne basqa da ınertti materıaldar óndiriletin 14 iri karer jumys isteıdi. Inspektsııa mamandary ruqsat etilgen parametrlerden asyp ketkeni úshin júk jóneltýshilerge qatysty 22 ákimshilik materıal toltyrdy.

Budan bólek aýyr salmaqty jáne iri gabarıtti júkterdi tasymaldaý erejelerin buzǵany úshin júk jóneltýshilerge qatysty 27 ákimshilik is qozǵap, 9,4 mln teńge somasynda aıyppul óndirip aldy.

Buǵan deıin SQO-da jol mamandary tóselgen asfalttyń tez buzylý sebebin túsindirgen edi.