SQO-da bıyl 8 sút-taýar fermasy paıdalanýǵa berilmek

<p>PETROPAVL. KAZINFORM — Soltústik Qazaqstan oblysyna Germanııa men Danııa koroldiginen asyl tuqymdy iri qara mal jetkizildi. Saýyn sıyrlar jańadan ashylǵan sút-taýarly fermalarǵa alynyp jatyr.</p>

Asyl tuqymdy iri qara maldyń alǵashqy partııasy — 34 bas golshtıno-frız sıyry SQO Qyzyljar aýdany «Molodoe-agro» JShS jetkizildi. Qazir karantınde tur.

Oǵan deıin sharýashylyq Arhangelka eldi mekeniniń mańynda salynyp jatqan sút-taýarly fermasynyń qurylysyn aıaqtap, paıdalanýǵa bermek.

Jańa ferma 200 bas iri qara malǵa shaqtalǵan.

Foto: SQO aýyl sharýashylyǵy basqarmasy

«Sút-taýarly fermalardyń aýyldarda ashylýy áleýmettik-ekonomıkalyq serpin beredi. Bul jobanyń iske qosylýymen 20 adam turaqty jumysqa alynbaq. Golshtıno-frız tuqymy sútti, tez jersinedi. Investıtsııalyq joba aıasynda taǵy 150 sıyr satyp ákelinedi. Nátıjesinde jylyna 1200 tonna sút alynbaq», — deıdi Qyzyljar aýdany ákiminiń orynbasary Dáýren Shaqanov. 

Osyndaı asyl tuqymdy mal birer kún buryn Danııa koroldiginen Shal aqyn aýdanyndaǵy «LTD Zha-Group» sút-taýarly fermasyna jetkizildi.

136 bas mal shildege deıin karantınde bolmaq. Óıtkeni nysan osy ýaqytta paıdalanýǵa beriledi. 

«SQO — sút-taýarly fermalardy salýdan el boıynsha kóshbasshy. Sońǵy 6 jylda 36 osyndaı ferma salyndy. Bıyl taǵy 8-i paıdalanýǵa beriledi. Bul sút óndirýdi arttyryp, jańa jumys oryndarymen qamtamasyz etedi», — deıdi SQO aýyl sharýashylyǵy jáne jer qatynastary basqarmasynyń basshysy Meıram Meńdibaev. 

Foto: SQO aýyl sharýashylyǵy basqarmasy

Aýyl sharýashylyǵy vedomstvosynyń málimetinshe, sońǵy úsh jylda óńirdiń sút óndirý kásiporyndary jyldyq qýatyn 388,8 myń tonnadan 451,3 myń tonnaǵa, ıaǵnı shamamen 14% arttyrdy.