SQO-da bıyl 60 myń adamǵa tumaýǵa qarsy ekpe egiledi

<p>Soltústik Qazaqstan oblysynda jedel respıratorlyq vırýstyq ınfektsııa boıynsha ótken epıdemıologııalyq maýsymda 53 myńnan astam adam aýyrdy. Bul onyń aldyndaǵy kezeńmen salystyrǵanda 1,7 esege kóp. Óńirde tumaýǵa qarsy ekpe jumystary bastaldy, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, JRVI-men aýyrǵandardyń 65% nemese 35 myńǵa jýyǵy — 14 jasqa deıingi bala.

«Qazan aıynan JRVI boıynsha epıdemıologııalyq maýsym bastaldy. Byltyr qazanda tumaý juqtyrýdyń alǵashqy derekteri tirkeldi. Al qarasha aıynda ol sharyqtaý shegine jetti. A tıpti vırýstar — shoshqa jáne Gonkong tumaýy jáne V tıpti vırýstar aınalymda boldy. Syrqattanǵandardyń 90% V tıpti tumaý bolsa, H1N1 — 8% jáne H3N2 — 2% tirkeldi. Osy maýsymda, QR Densaýlyq saqtaý mınıstrliginiń boljamy boıynsha, V vırýsynyń qosylýymen AN1N1 jáne AH3N2 vırýstary júredi, sonyń ishinde AN1N1 vırýsynyń basym bolý yqtımaldyǵy joǵary», — deıdi Arman Kúshbasov.

Búginde SQO-da JRVI-di juqtyrǵandar sany artyp keledi.

«Tumaý — adamnan adamǵa ońaı taralatyn jáne barlyq jerde kezdesetin óte jedel juqpaly aýrý. Ár adam tumaý vırýstaryna sezimtal keledi. Infektsııany naýqas adam taratady. Ádette dene qyzýy kenetten kóterilip, jótel paıda bolady. Bas, bulshyqet pen býyn aýyrady, adamda álsizdik bolyp, tamaǵy mazalaıdy jáne murynnan sý aǵady. Jótel 2 apta nemese odan da kóp ýaqytqa sozylýy múmkin. Aýrý jeńil de ótedi, al keıde tipti ólimge ákelýi múmkin. Jylda 3-5 mln adamda tumaý aýyr ótse, sonyń 290-650 myńy respıratorlyq aýrýlardan qaıtys bolady», — deıdi Arman Kúshbasov.

Tumaýdyń aldyn alýdyń tıimdi ádisteriniń biri — vaktsınatsııa. Ekpe aýrýdyń asqynýynan jáne ólimnen qorǵaıdy.

SQO-da 1 qazannan bastap tumaýǵa qarsy ımmýndaý naýqany bastaldy.

Preparatty tirkelgen jeri boıynsha emhanada qaýip tobyna jatatyn adamdar: medıtsına qyzmetkerleri, medıtsınalyq uıymda dıspanserlik esepte turǵan balalar, balalar úıleriniń tárbıelenýshileri, qarttar úıleriniń kontıngenti, epıdemıologııalyq kórsetkishter boıynsha 2-3 trımestrdegi júkti áıelder, sozylmaly aýrýlary bar adamdar, 65 jastan asqan adamdar tegin qoıdyra alady.

«Bıyl oblysta 60 myń adamdy nemese turǵyndardyń 11% tumaýǵa qarsy ekpe salý josparlanǵan. Ol úshin reseılik úsh valentti " Grıppol plıýs " vaktsınasy qoldanylady. Búginde 714 adamǵa ekpe salyndy, onyń basym bóligi ázirge medıtsına qyzmetkerleri», — deıdi departament basshysynyń orynbasary.